ZALEN February 5, 2026: Adviser to CM Lalmuanpuia Punte, MLA chuan Mizo zingah naupang lam doctor Super Specialist (pediatrician) hmasa ber Dr. F. Remthangpuii D/o F. Lalchawimawia, East Lungdar chu a bial chhung mi nihna angin a office-ah a lawmna thingpui inpui pahin inkawmna an nei.

Muanpuia Punte chuan, "Doctor-ah pawh super specialist hi kan nei tam lo hle, Dr. F. Remthangpuii, naupang lam Super Specialist (pediatrician) pangngai kan nei hi a lawmawm hle mai a, ka bial chhung mi ngei East Lungdar nula a lo ni leh zel hi ka lawm hle mai."

"Anni ang Super Specialist tan post awmsa kan nei mai lo chungin, mipui ten a tangkai thei ang bera kan chhawr theih nan kan Health Minister bulah pawh a chanchin ka lo sawi ang a, mipui ten a thiamna an chhawr tangkai theihna turin theihtawp ka lo chhuah dawn a ni. Hetianga fanu chhuanawm an nei hi Pu F. Lalchawimawia te nupa pawh ka lawmpui tak zet a ni," a ti bawk.

Dr. F. Remthangpuii hian Dr. NB/Super Specialist-in Pediatric Critical Care, Artemis Hospital, Gurgaon atangin a zirchhuak a ni.