ZALEN June 22, 2025 : Mizoram State AIDS Control Society chhinchhiah danin (May 2025 data) Mizoram-ah ruihhlo hmanga inchiu mi 14378 an awm mek. Hetih lai hian naupang zingah ganja zuk a hluar niin mi thiamte chuan an sawi bawk.

Mizoram State AIDS Control Society in 'one day seminar on drug abuse in Mizoram' a buatsaihah he thu hi tarlan a niin MSACS project director Dr. Jane Rinsangi Ralte chuan May 2025 thlenga zirchianna an neihah ruihhlo hmanga inchiu mi 14378 an awm tih a sawi a. Inchiu zinga a tam ber hi thalai niin kum 18 atanga 42 inkar deuh vek an ni a, ruihhlo hmanga inchiu chhinchhiah zingah hian Aizawl district-ah inchiu thin tam berin 5986 chhinchhiah an ni a, Saitual district-ah tlem berin 313 chhinchhiah an ni. Chhinchhiahna atanga a lan danin ruihhlo ngai zinga mi 5298 chu nitina inchiu thin an ni a, mi 9080 erawh nitin an inchiu lo thung. 

Ruihhlo hmanga inchiu zinga 58.32% chu nupui/pasal la nei ngai lo an ni a, 18.70% chu nupui/pasal nei lai, 15.78% chu nupui/pasal then tawh, 5.17% chu kawppui nghet nei leh 2.03% chu nupui/pasal sun tawh an ni. Inchiu thinte chhungkaw dinhmun zirchiannaah 59.43% chu nu leh pa leh unate nena cheng ho an ni a, 29.51% chu nu leh pa bula seilian lo, 8.40% chu awmna mumal nei lo leh 2.66% chu mahni chauha awm an ni. Ruihhlo hmanga inchiu thin zinga 57.39% hi nitin inhlawhfa an niin 32.43% chu hnathawh nei lo leh 10.17% chu thla tin hlawh nei an ni.

Drug chungchang zirhonaah hian Excise & Narcotics department joint commissioner Peter Zohmingthanga chuan rawlthar/ tleirawl zingah ganja zuk a hluar hle tih a sawi a. Tun hnai kum 5 kalta chhungin Excise ten ganja an man tam tih sawiin nikum 2024 chhung ringawt pawh khan kgs 883.984 an man tih a sawi a. 

Ganja an man tam chhan chu naupang zawk ten an duh vang tih sawiin pawl 3 vel atanga zu tan pawh an awm niin a sawi a. Mizorama ganja an man te chu Tripura state atanga lokal a tam ber tih sawiin Shillong lam atang pawhin sarep kara thuhruk engemaw zat an man niin an sawi bawk. Central YMA treasurer Roneihthanga pawhin ganja zu an tam tih sawiin pawl indin an awm hial niin a sawi bawk.