ZALEN, May 01, 2025: Adviser to Chief Minister Lalmuanpuia Punte, MLA chuan zirchiannaah Mizorama thil sual khawihtu zingah raltlan pawh ni kher lo, Myanmar mi hrim hrim hi zaa panga chauh an awm niin a sawi.

Zofa Global Network (ZGN) chuan Nilaini khan Tourist Lodge, Chaltlanga-ah ‘Zofa Global Convention’ an hmang a. Covention-ah hian ZGN Chapter hrang hrang - Manipur, Shillong leh Champhai atangin palai eng emaw zat an tel a. Mizorama NGO hrang hrang leh hnam pual zirlai pawl hrang hrangin an tel bawk.

Khuallian, Muanpuia Punte chuan thu belhchiah dawl lo hmanga raltlante beihna a nasa tih sawiin, “Zirchiannaah Mizorama thil sual khawihtu zingah raltlan pawh ni kher lo, Myanmar mi hrim hrim hi zaa panga chauh an awm. Buaina thleng a awmin fimkhur taka thu chiang hriat kan tum a ngai a. Hetianga raltlante puhna hian Zofate/Zohnahthlak impumkhatna atan harsatna a siam nasa hle,” tiin ZGN pawhin inpumkhatna tichak turin culture hmanga hma an lak chhunzawm zel a tul tih a sawi.

ZGN inkhawmpui lian leh rorelna sang ber, Zofa Global Convention hi hun hnihah then niin hun khatna, chawhma inkhawm hi an vice president, C Lalrambuatsaiha’n a kaihruai a. Hun hnihnaah rorel inkhawm neih niin, resolution pahnih, ‘Zofa hnam hrang hrang zingah unau hmelhai a awm leh thin hi a pawi kan ti tak zet a. Khawvel mithmuha hnam anga kan dinchhuah theih nan Zofa hnam hrang hrangte inngeih dial dialin, thukhat vuain i insuihkhawm ang u’ tih leh, ‘Social media-a unau leh unau rilru tina thei thuziak leh thusawi lakah fimkhur tlang theuh turin Zofa zawng zawngte kan ngen a ni,’ tih an pawm.

Covention-ah hian kum 2025-2027 chhunga pawl hruaitu tur an thlan nghal. 

Hruaitu thlan tharte:

President: C. Lalrambuatsaiha, Luangmual 

Sr. Vice President: Sangzela Tlau, Vaivakawn

Vice President: C. Dinthanga, Saron Veng

Vice President: Lalbuta, Edenthar

General Secretary: James Ramdinmawia, Electric Veng

Joint Secretary: F. Lalsawmkima, Chawnpui

Joint Secretary: Daniel Hauhnar, Chanmari

Treasurer: Julie Lallianzuali, Zarkawt

Finance Secretary: Lalremsangi Fanai (Tetei), Upper Republic