ZALEN June 29, 2025 : Mizoramah kum 1984 atanga kumin June ni 18 thleng khan ruihhlo vanga thi mi 1,912 an awm tawh. Hetihlai hian ruihhlo ngai enkawlna 46 Mizoramah a awm mek.

Excise & Narcotics Department (END) chhinchhiah danin kuminah ruihhlo vanga thi mi 33 an awm tawh a. Ruihhlo vanga thite hi mipa 28 leh hmeichhia panga an ni a, heroin leh damdawi dang tihpawlh hman sual vanga thi an ni.

Nikum chhung khan ruihhlo hman sual vanga thi mi 67 an awm a, mipa 58 leh hmeichhia pakua an ni. Ruihhlo ti thinte thihpui tam ber hi heroin a ni a, a bak dang pawh hi heroin leh ruihhlo dang tikawpte an ni.

Kum 1984 atanga kumin thlengin Mizoramah ruihhlo vanga thi mi 1,912 an awm tawh a, chung zinga 1,679 chu mipa niin hmeichhia 233 an awm bawk.

Chhinchhiahna atanga a lan danin 2004 kha ruihhlo vanga thi an tam ber kum a ni a, hemi kum hian damdawi hman sual vangin mi 143 an thi.

ZALEN thudawn danin, social welfare department-in a hriat theih chinah Mizoramah ruihhlo ngai enkawlna 46 a awm mek a, chung zinga center 11 te chuan Ministry of Social Justice & Empowerment atangin fund an dawng thin.

Jordan Center, Sethawn, De-addiction Center atana hman reng thin chu tunah hian Afrer Care Skill Development Center atan kalpui tura ruahman mek a nia, kohhran lam ten enkawl hna an thawk thei em tih zawh mek an ni a, PCI leh BCM te biak an ni. Anni hian an kalpui theih loh chuan sawrkarin a enkawl hna a chhunzawm ang.