ZALEN June 11, 2025 : MNF Policy & Programme Board Meeting Vawi 3-na vawiina neihah thalaite hna thawh tur siam sak leh, hnathawk thei tura thiamna neia thalaite chher chhuah dan tur sawi ho zingah a langsar ber a ni a, Mizoram Health Care Scheme mumal zawka duan dan tur sawiho a ni bawk.

Thiamna bik leh tawn hriat chi hrang hrang neite telna MNF Policy & Programme Board Meeting hi Mizo Hnam Run, President’s Chamber-ah neih a ni a, Board chairman MNF Sr. Vice President Dr. R. Lalthangliana, Health Minister hlui chuan sawrkarna siam leh tura inbuatsaihna ngawrh taka an kalpui chhoh mekah Zoram mipuite tana innghahna tlak Policy leh Programme, a taka kalpui theih tur duan chhuah a tul tih sawiin member te chu uluk taka ngaihtuahna seng turin a chah a ni.

Sawihonaah hian mipui nawlpuite an damloh nikhuaa an inenkawlna, Mizoram Health Care Scheme mumal zawka duan dan tur huam zau takin an sawiho a. Tuna ZPM sawrkarin Mizoram Universal Health Care Scheme a kalpui mekah ruahmanna fel lo tam tak a awm avanga miretheite tawrhna thleng mek chungchang te, Sawrkarin Pvt. Hospital te in biak remna a neihpui hmasak loh avanga damlo ten an tawrh mek dan leh Sawrkar Damdawi In-a khum chang si lo, Pvt. Hospital ban phak bawk si lo, manganna tawk mek damlo tam tak an awm thu thutkhawmah hian sawilan a ni.

MNF Policy & Programme Board vawiina thukhawm hian thil dang bakah mizo thalaite tana hna thawh tur tam zawk siam belh leh, hna thawk thei tura thiamna neia thalaite chher chhuah chungchang chu an sawiho zingah a langsar hle a. Hemi kawngah hian policy tha leh rintlak duang chhuak ngei turin fimkhur tak leh uluk taka zirchianna kalpui nise an ti.