ZALEN April 23, 2025 : MPCC President Lal Thanzara chuan chuan vawiin khan Zamuang, Kolalian, Hriphaw, Sihthiang, Chuhvel leh Saikhawthlir khuate tlawhin Congress Party ah mithar a lawmlut a, he huna thu a sawinnah MNF leh ZPM chuan Hachhek tlangdung mipuite dinhmun kuhva tawlh ruk hmangin an tihchhiatsak niin a sawi.

MPCC President chuan, "Mizoram mipuiin ZPM party enchhin an chak a, hei hi Congress a sawrkar lehna tura kawng min sah kuak sakna niin a lang a. Enchhin sawrkarin mipui beisei a phak lo nasa hle a, hei hian Congress party Mizoram tana a lo thatzia tichiangtu leh fiahtu a ni," a ti.

Lal Thanzara chuan, "Tawngkam dengkhawng taka Congress Bhawan ka lilam dawn titu chuan a inzawrhna anga ti thei si lovin kuthnathawktute harsatna thlentu Smuggling thil mipui hriat lohin an lilam mek a ni. Kuhva lang lovin thlâ a lak theih loh tih khawpin Hachhek tlangdungah NLUP chingtute an hlawhtling a, dinhmun nuam takah an din phah a ni. Mahse Kuhva tawlh ruk hmangin MNF leh ZPM sawrkarin a tihchhiat sak a, a lungchhiat thlak hle a ni," a ti.

Lal Thanzara chuan, "Congress a sawrkar loh chuan Hnam hnufual leh tlem zawkte an him lova, mipuiah sum lengvak a tlem a, ruihhlo ti leh ruihhlo zawrh a hluar a, khawtlang nun a him lo a, Congress party hi Mizoram mamawh chhanna a ni, a ti bawk.

Congress Party hruaitute hian NLUP tanpuina atanga Kuhva leh Rubber chinga eizawnna mumal neite a hmunah a tlawh nghal bawk a ni.