ZALEN May 26, 2025 : Vawiin khân Mizo Hnam Rûnah MNF Thalai kaihhruaiin chhûng inkhawm neih a ni a, Robert Romawia Royte, MLA leh MNF Thalai President ni bawk chuan chuan, tun sawrkarah hian dawtin pâr a chhuang nasa a, MNYF-in dawt 100 kan hal hnuah pawh sawrkar hotute dawt sawi hal tur a tam leh tawh a ti.

ZPM sawrkarin CBI-te an thu thua mi chhui theihna an pek uk chu reiloteah an sut leh tih sawiin Robert Romawia Royte, MLA chuan, "ZPM te'n MNF sawrkar nasa takin an puhchhe thin a. Thudik mipuiin an hriat theih nân MNF CM-te, MNF Minister-te leh MLA-te hi kan kut phuar a nih lai ngei hian ZPM sawrkar hian CBI ko lutin min chhui vek se la."

"Chutiang bawkin CBI-te hian ZPM sawrkar hnuaia SASCI project-a UC dik lo siam chungchang te, sawrkar empanelled firm-te hmunphiah lei leh hralh dan chungchâng te, open tender chhang hniam ber pe lova a chhang sang ber pek daih dante etc. hi chhui ve bawk sela. Chutah chuan thu dik a lo lang ang a, chu chu MNF kan din chhuah lehna atâna pawimawh a ni," a ti.