Mizoram State Commission for Protection of Child Rights (MSCPCR) chuan pawngsual leh hursualna naupang chunga thleng leh thin chu a ngaimawhin pawi a ti.

Vawiin chawhma dar 11 khan MSCPCR chairperson Jimmy Laltlanmawia chuan thuthar thehdarhtute kawmin, tunhnaia naupang kumtlinglo khawihchhiaa, midang hmuh theih tura hursualna video bawlhhlawh siam na'na naupang inhnamhnawihtir tu leh pho lang tu Lalrampana chu CBI ten June ni 9, 2025 khan an rawn man tih a sawia. "Kan ram chhunga hursualna leh a kaihhnawih naupang chunga a thleng leh thin hi Commission chuan pawi a tiin a ngaimawh takzet a ni," a ti.

"The Protection of Children from Sexual Offences (POCSO) Act, 2012 Section 13, 14 & 15 chuan hursualna leh zahmawh rawngkai video leh thlalaka naupang inhnamhnawih tir leh tel tir emaw, hman tangkai emaw, entir leh hmuhtir emaw pawh a thiang lovin a khap tlat a. Chumi piah lamah, naupang laka hursualna leh zahmawh rawngkai lanna thlalak leh video reng reng, mimal kawlṭhat tur a ni emaw, midang hmuha pho lan tur a ni emaw pawh lo neih leh lo kawl pawh a khap tlat a ni. He Dan bawhchhetu chu kum-5 aia tlem lo Lung-In tan tir leh sum chawitir thlengin a huam a, a tisual nawn tu chu kum-7 thleng tang tura hrem theih a ni," a ti bawk.

Jimmy Laltlanmawja chuan Commission chuan heng Dan bawhchhiatna hi kan ram chhungah thleng tawh lo se a duh tih sawi bawkin, "Tun hnaia naupang khawih chhetu Lalrampana leh midang hetianga inhnamhawih te hian an phú tawk hremna hmu ngei se a duh a ni," a ti bawk.

#ZalenNews