ZALEN July 14, 2025 : Mizo Students’ Union (MSU) General Headquarters chuan tunlaia Social Media site hrang hrangah thudiklo hmanga inpuhna awm mek chu pawi a ti a, Mizoram mipui leh khawvel hmun hrang hranga Zofate hriat turin thuchhuah a siam a, MSU hruaitu ni thin anga sawi William-a chu Chin zirlai raltlante buaipui tur an ruat a nih thu an sawi.

MSU chuan Myanmar tualchhung buaina avanga Zohnahthlak unau raltlante hi theihtawpin a lo buaipui thin a, heng atan hian America ram atangin Foreign Aid (Medical Equipment) te chahlutin theihtawpin chhawmdawl hna a thawk thin. Hetiang thil buaipui a nihlai hian Myanmar lama zirlai pawl a kan thawhpui Chin Students’ Union (CSU) te phungbawm ah sawm thin an ni. Tunhnai a social media a hming rawn lang William-a hi kum 2022 chhung khan Chin zirlai raltlan harsatna tawkte buaipui turin ruat a ni a. A ni chauh lo pawh MSU hian Chin unau pawl hrang hrangte thleibik awm lovin a remchan dan ang angin a thawhpui thin a ni, an ti.

Kum 2024 atanga hruaitu thar kaihhruaina hnuaiah MSU a kal atangin Myanmar unau pawl hrang hrang hi MSU chuan thawhpui a la nei rih lo a, tanpui an ngaihna ah erawh chuan Unaute tan theihtawp chhuah turin a inhawng reng a ni, an ti bawk.