ZALEN June 16, 2025 : Vawiin khan MSU hruaitute chuan Mizoram Public Service Commission (MPSC) Chairman leh Secretary hmuin, hnalak exam result tihchhuah har chungchang an zawtfiah a ni. 

MSU hruaitute chuan nikum (July 29, 2024 & July 31, 2024) a State Tax Officer leh Co-operative Audit Officer lak tawh thla-10 hnu pawha exam result la chhuak lo leh, Common Competitive Exam nikum (Dec 17 2024) a exam tawh result la chhuaklo chungchang chu MPSC Chairman leh Secretary hnenah hian an zawtfiah a. Mizo thalai exam beituten hna dang an exam lehna tur kawngah harsatna a siam avangin, heng exam result te hi a rang thei ang bera tichhuak turin an ngen a ni. 

MPSC Chairman hian heng hnalak kal mekte hi Evaluator lamah harsatna tlemte an neih avanga tichhuak har an nih thu a sawi a. June 27 2025 (Zirtawpni) ral hmaa Exam result tihchhuah an tum ngei thuin a lo chhang a ni. 

MSU hruaitute chuan MPSC hotute thu hi ngaihchan hmasak ṭha ati a. June 27, 2025 ral hmaa exam result hi a chhuah ngei an beisei a, an ngaihven reng dawn a ni.