ZALEN July 6, 2025: Mizoram Health Care Society chuan June, 2025 tawp thleng khan Mizoram Universal Health Care Scheme (MUHCS) hnuaiah damlo mi 14,579-te inekawlna senso Rs. 18,15,50,923 a pe tawh.

ZALEN-in Mizoram Health Care Society thawktute hnen atanga thu a dawn danin MUHCS hnuai sum pekte hi AB PMJAY hnuaia damlo mi 10,561-te inekawlna senso Rs. 9,31,29,734; sawrkar hnathawk mi 1,078 inenkawlna senso Rs. 2,67,31,465; MUHCS-a inziak lut (contributory) 2,238-te inenkawlna Rs. 4,01,63,602; pensioner 696-te senso Rs. 2,09,94,136 bakah provisional emplyee parukte inenkawlna Rs. 5,31,986 te an ni.

MUHCS-a inziak lut (contributory) hi hriat theih chinah mi 13,403 awm tawhin hengte hi offline hmangin 12,817 leh online hmangin 586 an ni a. Inziah luh hun hi June thla thleng kha hawn niin inziah luh hun khar dawnah enrollment tithar an pung nasa hle a, kar hnih kalta vela mi 5,000 vel emaw chauh inziak lut kha hun a tawp meuh chuan an pung nasa hle.

MUHCS hi Mizoram chhunga sawrkar damdawi in zawng zawngah hman theih anih bakah private damdawi in 14- Lunglei district ah pahnih Serkawn damdawi in leh Faith hospital; Champhai district ah MED AIM leh DM hospital; Lawngtlai dist.-ah Lairam Christian Medical Centre (LCMC) leh Christian Hospital Lawngtlai, Siaha dist.-ah Maraland Gospel Centenary (MGC); Aizawl district-ah Vohbik Day Care, Rapha Day Care, Kidney 360 Superspeciality, JC Eye hospital, Nazareth hospital Chal­tlang, Nazareth hospital Ramhlun North leh Redeemed hospital te chuan an pawm tawh a. Hei bakah hian state pawna damdawi in 27- Guwahati ah 4, Kolkata ah 5, Max hospital 9, Narayana health Kolkata a damdawi in 4, Manipal hospital Kolkata a 4 bakah New Delhi-ah 1- Indian Spinal Injury Cente-ah te hman theih a ni tawh bawk.

Mizoram Health Care Society hian damlo inenkawlna bill hi April ah Rs. 1,09,52,454 leh May thlaah Rs. 5,55,65,481 an pe chhuak a ni.

MUHCS-ah hian contributory bakah AB PMJAY chhungkua 216,584, pensioners 8008, sawrkar hnathawk nghet leh provisional employee zawng zawng bakah CSS/GIA te chu tel sa an ni.

MUHCS hnuaiah hian damlo refer mi 376 te bill chu pek fel a ni tawh bawk.