ZALEN May 11, 2025: Health Minister Lalrinpuii chuan Mizoram Universal Health Care Scheme (MUHCS)-ah a tul angin sawrkarin sum a ngaihtuah zel dawn tih sawiin sum lamah thlaphanna tur a awm lo tih a sawi.

ZALEN-in a kawmnaah health minister chuan, “MUHCS-ah hian corpus fund atangin sum dah a ni a, a tul angin lottery atangin dah tum a ni bawk a. Hei bakah hian ADB atangin loan hmuh beisei niin bank nen thawhhona siam a nih bawk avangin thlaphanna tur a awm lo a ni,” a ti.

Sawrkarin sum lo nei tam lo deuh pawh nise thlaphanna tur a awm lo tih sawiin, “Financial back up kan nei tha a, bank nen inremna siamin sawrkarin damlo inenkawlna sum hi a pe thei ta lo a nih pawhin bank-in an pe thei dawn a; chuvangin, nei tha tawkah kan inngai a ni,” a ti bawk.

Health minister chuan MUHCS atan sawrkar chu a inbuatsaih chho zel tih sawi bawkin, “ZMC&H-ah cabin 30 siam a nih bakah khum 50 kan nei thar a. Aizawl khawpui chhunga UPHC pangaah damlo admit theih vek a ni a. Tun atanga hun rei lo te-ah RIPANS-ah khum 100 kan nei dawn a, Siaha, Lunglei leh Champhai damdawi inah ICU dah thar tum a nih bakah Civil Hospital, Aizawl-ah cath lab building sak mek niin an pual hian ward pawh neih tum a ni,” a ti bawk.

Mizoram Health Care Society (MHCS) thawktute sawi danin MUHCS kalpui hnuah inziak lut 2,549 an awm tawh tih an sawi a, inziak lut an tlem chhan zawhna chhangin, “Inziah luh hun hi la hawn mek zel a nih avangin tun dinhmunah tlem angin lang mah se an la pung zel turah kan ngai a. Inziak lut an tlem chhan nia lang hi golden card neite inziah luh an ngai lo va, anni bakah sawrkar hnathawk leh pensioner-te an inziah luh a ngaih loh bawk avangin a tlem angin a lang a ni,” an ti.

MHCS thawktute sawi danin golden card nei hi chhungkaw 2,18,000 vel awmin mihring nuai 8 vel huamah an ngai a. Sawrkar hnathawk mek hi mi 42,000 vel awmin hetah hian mi 1,60,000 vel bakah pensioner mi 34,000 vel an awm bawk avangin Mizoram mihring mi nuai 12 vel atanga chhutin inziak lut tur hi an tam lo hrim hrim niin an sawi bawk.

MHCS thawktute chuan tun dinhmunah MUHCS cashless hmangin kar tin bill an pe niin an sawi a. April thla chhung khan damlo mi 3,492 te bill vbc. 2.8 chu an pe tla vek tih sawiin bill hi kar tin an pe niin an sawi bawk.