ZALEN May 4, 2025 : April, 2025 atanga hman tan, Mizoram Universal Health Care Scheme (MUHCS)-ah Mizorama private hospital tam zawkte tun thlengin an la tel lo a, Non-Government Hospital Association, Mizoram (NGHAM) hruaituten an dinna ngaiah an la ding tih ZALEN an hrilh.

NGHAM hruaitute hnen atanga thudawn danin MUHCS zawm leh zawm loh chungchangah Mizorama private hospital tam zawkte chu an dinna ngaiah an la ding a, tun dinhmunah chuan zawm mai an la tum lo.

Hetihlai hian private damdawi in thenkhat atanga ZALEN thudawnnate chuan MUHCS vangin an damdawi in pantu an kiam phah lo niin an inhria tih an sawi a, MUHCS hman hma ang reng thoin pantu an nei niin an sawi.

MUHCS hnuaiah hian AB PM-JAY, Mizoram State Health Care Scheme leh sawrkar MR-te chu chhun fin an ni a, kalphung khat hnuaia kalpui a ni.

Hemi hnuaia hamthatna dawn theih dan erawh siam danglam a ni thung. Civil pensioner leh provisional employee-te pawh pawh he sheme hnuaiah hian hamthatna siamsak an ni.

He scheme hnuaia hian chhungkaw tinten kum khatah Rs. nuai 5 thleng an bill thei dawn a, Rs. 2,500-in registration tih a ngai a. Sawrkar hnathawkte tan a hranpaa registration tih a ngai lo a, thla tin an pay level a zirin an sum thawh zat tur erawh a inang lo.

MUHCS-te hi sawrkar damdawi inte leh empanelled hospital-te-ah hman theih a ni a, sawrkara inziak lut lo damdawi inah erawh hman theih a ni lo.