ZALEN May 7, 2025; Mizo Zaimi Inzawmkhawm (MZI) General Hqrs. chuan May ni 8, 2025 (Ningani) zan hian missionary leh Kross sipai (eng kohhran pawl mi pawh) natna khirh tak tuar te pualin charity concert a buatsaih dawn a. Pathian ram zauh tura theihtawp chhuahtu, natna khirh tak tuar te tana luang chhuak turin mi zawng zawng an ngen.

He charity concert hi Upa C. Ngurthantluanga'n Pathian hnena a hlan hnu ah zaithiam tak tak ten hun an hmang dawn a. Youth Icon star te bakah Pathian fakna hla sa thin zaithiam hriathlawh tak tak leh Pathianin a hman tak tak ten Pathian rawngbawltu, natna khirh tak tuar te tan an zaithiamna te an hlan theih tur thu an tichiang tawh. 

MZI hruaitute chuan kohhran pawl hrang hrang mission field lama thawk, kohhran leh kohhran hnuaia pawl hrang hrang leh mimal thahnemngai ten an chawm zingah damloh nikhuaa inenkawl kawnga sum lama harsatna tawk an awm fo thin tih an sawi a. Hetianga harsatna tawk te tana luangchhuak duh te tana luanchhuah theihna remchang siam chu an tum a nih thu sawiin, Pathian ram zauh tura theihtawp chhuahtu, damlo harsa te tana luang chhuak turin mi zawng zawng an ngen bawk.

He charity show hi Ignite studio atanga neih tur niin, Zonet, LPS leh MZI youtube channel-ah te live-a pek chhuah tura ruahman a ni.