ZALEN July 10, 2025: Mizo Zaimi Inzawmkhawm (MZI)-in Missionary damlo pual charity concert-a mipui sum thawh tlingkhawm atangin Missionry damlo 4 an kan tawh a. Tun thla - July ni 18, 2025 zan hian Cancer, inenkawlna tura sum harsatna nei te tana luangchhuak duh tan remchang siam leh turin charity concert an buatsaih leh dawn bawk. 

MZI hian May ni 8, 2025 zan khan Missionary damlo puih ngai te pualin charity concert hi an buatsaih a. hemi tuma mithahnemngai te sum thawh tlingkhawm Rs. 1,04,351 atangin kohhran hrang hrang mission field hrang hranga missionary damlo 4 an kan a ni.

Missionary damlo, inenkawlna tur sum lama harsatna tawk te tana luangchhuak zawng zawng hnenah MZI chuan lawmthu an sawi a. An hmalak zel na turah pawh mipui tawiawmna leh thlawpna an ngen bawk.

Tun thla - July ni 18, 2025 zanah Inginte studio, Aizawl atangin Cancer, inenkawlna tura sum harsatna nei te pualin charity concert an buatsaih leh dawn a. LPS, Zonet leh MZI youtube channel-ah te live-a tihchhuah a ni ang. He charity concert kaltlanga damlo mangang te tana luang chhuak leh turin MZI chuan mi zawng zawng a ngen a ni.  

MZI hian kumin August thla ah High School leh Higher Secondary School zirlaite pual band inelna buatsaih turin hma an la mek bawk.

#ZalenNews