ZALEN April 15, 2025; Nimin tlai thim dawn khan Siaha Meisa Vaih naupang pahnihte chu vanduaithlak takin tuiah an tlahlum.

Tui tlate hi SN.Lallawmkima (12) S/o SN.Thanzara Siaha Meisa vaih West leh Zakaria (8), S/o LC.Jonasia, Siaha Meisa vaih West an ni a. Anni pahnih hian an chhungte Chhimtuipui, Tuipui Ferry kai a pick up a insu tur motor-ah an chuang ve a. An insukna hi Siaha leh Lawngtlai inkar R. Beinò (Chhimtuipui lui) Leilawn (Seasonal Bridge) chhak a insukna thinah a ni.

Thu laknain a tarlan danin, an chetsual lai tak hi tuman an hmu lo va, haw tuma an insingsak vel chuan anni pahnih hi an kim lo a ni tih an hre chauh a ni.

T. Ferry khaw chhungah zualkoin tlangvalhoin an chapal leh thawmhnaw awmna zawnah chuan an rin zawn ta a. Nizan dar 8 velah khan an ruang hi inhlat vak loin an hmu ta a ni.

MTP Branch T. Ferry-ten kuang an siamsak a, thlahna hun te an hman zawh hnuin Siaha lamah phurh chhoh nghal an ni. An ruang hi vawiin chhun 12-ah Meisa vaih thlanmualah vuiliam an ni ang.