ZALEN May 29, 2025 : Kings & Prophets Promotions chuan May Ni 30 zan 7:30 hian LPS Arena-ah 'NBE TATA Motors Clash of the Stars' chu a buatsaih leh dawn a, he huna Drew Pachuau leh Rala Kone te inhnek tur chu hriat a ni tawh a. Lalrinsanga Tlau leh John Kenty-a te pawh an inlan dawn a, anni hian Thai leh Russian boxer te an hmachhawn dawn a ni.

Clash of the Stars hi Professional and Exhibition boxing event ni in 2022 khan a vawikhat na’n buatsaih a lo ni tawh a. Hemi tum hian kan Mizo rapper lar G’nie leh film star Papuia Pachuau ten Professional Boxing an khel a ni. Kumin hian show changtlung leh hmuhnawm zawk mipuite chhawp chhuah sak ngei tuma inbuatsaihna kalpui a ni.

Mizoram boxing khawvela bûk rit tak inhnek hmuh tur a awm dawn a:- Lalrinsanga ‘Sangtea’ Tlau leh “Thai boxer Poon BBN” chu main event-a inhnek tur an ni a. Sangtea Tlau hi Mizo Zinga World Boxing Champion awmchhun a ni a, hun engemaw chen a chawlh hnu-a a inhnek leh hmasakna ber tur a ni. Sangtea tum tur Thai boxer hi record tha tak neiin a coach pawh Thailand tana Olympic boxer lo ni tawh thin, an veteran pakhat a ni.

Co-Main Bout atan Mizo boxing ngaina tuten a inhnek an enchak rawn John Kenty Vanhlimpuia'n feet 6 leh inches 2-a sang, Russian boxer, Mikhail Vetrila, experience nei tha tak chu a hnek dawn bawk a ni.

Celebrity exhibition match hmuh tur a awm tel dawn bawk a, DREW PACHUAU leh RALA KONE te an inlan ang. Drew Pachuau hi In-House Production neitupa leh host thin kha a ni a, tunhnaia Mizo filmmaker hlawhtling ber te zinga mi a ni. A tumpui tur RalaKONE pawh hi Film Actor leh E-Gamer lar a ni a, Mizo E-Gaming community-ah chuan a hming lian ber pawl a ni a, Mizoram aiawh te pawha lo chhuak tawh thin a ni.

Anni bakah hian Mizo boxer tha tak2 pali dang inhnek tur awmin, an zinga pahnih hian Meghalaya boxers an hmachhan ve thung dawn ani.

Hlubawiha vs Johnny Nongrum (Meghalaya)

Denis vs Franky Momin (Meghalaya)

Enkawltira vs Eric Curtman

Youth Icon Taitea leh Mizo Idol Hmangaihi ten hemi zan hian mipui te zaiin an awi dawn a, Lil Kiki te pawn Rala entrance ah an zai dawn bawk a ni.

Event zan hian 7:30-8pm inkarah Boxing tan hma in Giveaway an ti dawn a. Mipui ten lo ngaihven vek turin an sawm bawk a ni.

A hmuna enna ticket leitu leh YouTube livestream enna tur lei zawng2 ten giveaway dawn theihna chance in ang vek an nei dawn a.

Giveaway tur hi

* Pakhatna (1) TVS NTORQ emaw iQube

* Pahnihna (2) iPhone 16

* Pathumna (3) Haeir Google Smart TV 50 inch… te niin, giveaway pakhatna dawngtu hian KC TVS ah petrol scooter NTORQ emaw electric scooter iQube a duh zawk a thlang thei dawn a ni.

YouTube Livestream hi LailenTV YouTube channel ₹199-a join in a en theih dawn a. A hmuna en turte tan online-in, www.triket.in ah emaw, ticket counter NBE Tata Motors Showroom, Khatla, Aizawl Hospital bul, leh Jack & Jill Mini Store, Zarkawt ICICI Bank bulah te cheng ₹300 leh ₹500 in lei tur a awm a, a hmunah ticket hi lei theih a ni bawk ang.