ZALEN June 24, 2025 : NHIDCL kawng laih avangin Ngopa Damdawi In tlang-ah nasa takin lei a min a, Manipur leh Mizoram inkalpawhna a ping rih. Leimin hian In pahnih chu bungrua engmah chuh hman lohvin a hnawl a, Damdawi In-a awm te pawh sawnchhuah an ni.

He leimin hi chawhma dar 10:30 atangin tlem tlemin a tla tan a, chhun Dar 12:00 velah nasa vak lovin a min a, chawhnu dar 2:20 velah nasa zawkin a min leh a ni. Ngopa YMA atanga thudawn danin leimin hi hei aia nasa zawk thleng thei a nih thu an sawi a, a mual hian tawlh thei dinhmunah a ding an ti.

Lemin-in a hnawl In pakhat zawk hi chenna in a ni a, pakhat zawk hi workshop a ni thung a, bungrua pakhatmah an chuah hman lo a, thi leh hliam erawh an awm lo. In pathum chu tunah hian luah ngam loh a ni bawk.

Ngopa atanga thudawnna chuan leimin avang hian Damdawiin OPD leh Choka bungrua te chu thiarchhuah vek a nih thu an sawi a, damlo awmte pawh hmun him lama sawnchhuah a ni an ti.