Aizawl : MADC Biodigester Centre-ah Organic waste (wet waste) converter khawl bun chu District Bawrhsap, Bhupesh Chaudhary, IAS chuan Bharat Petroleum Corporation Limited (BPCL) te CSR atanga a dilchhuah chu Zirtawni khan a hawng.

Organic waste converter (Biodigester) hian tawihral thei thil te chu ni 10 chhungin lei tha (compost) ah a chantir thei a, nikhatah organic waste 400kg compost-ah a chantir theih dawn a ni. Biodigester hian Bawlhlawh thliarhranna tray te, a pawtsawmna khawl te, bacteria, bawlhlo leh bawlhlawh pawtsawm tawh chawhpawlhna khawl te, composting rack te a chhawm.

Biodigester hi DC Bhupesh Chaudhary hian Bharat Petroleum Corporation Limited(BPCL) te CSR atanga a dilchhuah niin, Cheng nuai 19 senga din a ni. DC hian Organic bawlhhlawh lakkhawmna/ phurna tur lirthei 2 pawh BPCL te CSR atangin dilchhuakin LAD, MADC kutah a lo hlawn tawh bawk. He Organic waste converter hi Siaha DC Bhupesh Chaudhary IAS chuan LAD, MADC te hman atan Pu N.Zakhai, CEM,MADC nen MoU sign dunin MADC kutah a hlan ta a ni.

Biodigester hawnna a thu a sawinaah, Deputy Commisioner chuan, "Hetianga bawlhlawh sawngbawlna project hi Mizoramah a vawikhatna a ni a, bawlhlawh kan sawngbawl dan hian kan faina chungchangah chauh kawngro a su lova, kan rilru hmasawnna thlengin a nghawng dawn a ni," He project hlawhtlingna thuruk chu thawhhona tha a nih thu sawiin, sawrkar mi leh sa bakah, tlawmngai pawl, VC leh mipui mimir hian mawhphurhna an nei vek thu a sawi bawk. DC hian, "Kan bawlhlawh te hi bawlhlawh paih lirthei in a lo lak khawm hma hian mahni in-ah theuh a dahna hran lo siamin tawihtheih leh tawihtheih lo te hi lo thliar lawk vek ang u. Hei hi chhungkaw tin leh mitin mawhphurhna a ni tih hria i ang u," tiin mipui te a ngen.

"Plastic leh non- plastic waste te pawh thliarhrang i la, a sawngbawlna khawl tur pawh company lian te hnenah an CSR atangin kan dil mek a ni.. Hawh u, kan district hma a lo sawn zualzel theih nan leh kan lo fai zual zel nan i thawkho te ang u," tiin kalkhawm te chu a sawm bawk a ni.