ZALEN May 6, 2025; Mizoram Board School Education (MBSE) chuan vawiin chhun dar 12 khan Higher Secondary School Leaving Certificate (HSSLC) Examination 2025 result a tichhuak a, zirlai exam 12,105 zinga 9,817 an pass a, pass percentage chu 81.10 niin, nikum pass parcentage 78.04 aiin a sang zawk.

Vawiina result tihchhuahah hian Arts stream ah Lalrammawii Tochhawng D/o Reuben Lalrinkima, Mount Carmel School, Aizawl chuan mark 500 ah mark 471 hmuin pakhatna a ni a. Commerce stream ah Kristin Laldinpuii Ralte D/o Lalsangliana Ralte, Oikos HSS, Aizawl in mark 500 ah 470 hmuin pakhatna a ni a, Science stream ah Cynthia Lalhlupuii Shangpliang D/o Kyrshanbor Shangplian, St. Paul's HSS, Aizawl chu mark 500 ah 477 hmuin pakhatna a ni bawk.

HSSLC result chhuakah hian exam beitu 12,105 an awm a, Arts Stream ah 8,658, Science Stream ah 2,798 leh Commerce Stream ah 649 awmin pass zatah mipa aiin hmeichhia 1,035 in an tam zawk a ni.

HSSLC result chhuakah hian candidate zawng zawng pass vek sikul hi Arts ah 46, Science ah 9 leh Commerce ah 2 a awm a. Candidate zawng zawng fail vekna school hi Arts ah school 2 leh commerce ah school 2 a awm.