ZALEN June 29, 2025: Pension tawhin driver/lirthei chhawr zui titawp tura sawrkarin thupek a chhuah chuan zawm a hlawh hle tawh nia thudawn a ni.

Mizoram sawrkara General Administration Department (GAD) chuan kumin January 20 khan sawrkar hnathawk officer pension tawh, lirthei leh driver chhawr/hmang chhun zawm an awm tih sawrkarin a hriat thu leh a rang thei ang bera titawp turin thupek a lo chhuah tawh a ni.

He thupek chhhuah bawhzui a nih dan chungchanga ZALEN thudawn danin thupek chhuah a nih hma leh sawrkarin hemi chungchanga hma a lak tak tak hma kha chuan pension tawh driver leh lirthei chhawr zui an awm thin a, thupek chhuah a nih hnu leh sawrkarin khauh zawka hma a lak hnuah erawh hetiang ching zui hi tun dinhmunah chuan an awm hriat a ni tawh lo.

Commissioner & Secretary, Govt. of Mizoram GAD-in office memorandum a tihchhuaha tar lan a lo ni tawh danin Mizoram sawrkara officer pension tawh thenkhat, officer thawk laite tan chauh a ruahman, sawrkar atanga hamthatna, lirthei leh driver-te pawh huamin chhunzawm an la awm tih sawrkarin a hria a, sawrkar chuan he thil hi a ngai thutak hle.

Lirthei emaw, driver emaw hmang zuitu officer pension tawh zawng zawngte chu department-ah thawn kir nghal tura hriattir an ni a. Phalna nei loa sawrkar thil neih hman zui chu dan bawhchhiatna a ni tih office memorandum-ah chuan tar lan a ni.

He thupek hi tikhawtlai lova zawm ngei ngei tur a ni tih head of department-te hriattir an ni bawk a. Heng thupekte hi zawm lo an awm a nih chuan a kaihhnawih officer pension tawhte emaw, department hotute emaw chungah sawrkarin action a la ang. 

Mizoram state sawrkar chuan discipline khauh taka vawn a tum avangin, he office memorandum hi khauh taka zawm a beisei tih tarlang bawkin, a kaihhnawih department-te chu he thil hi ngai pawimawh a, a tul anga hma la nghal turin a ngen bawk.