ZALEN June 4, 2025; Nimin khan Mizoram-ah POL leh LPG lakluh a tlem hle.

Supply department check gate, Vairengte chhinchhiah danin oil leh gas phurtute hi truck 7 an ni. Chhinchhiahna atanga a landanin diesel hi 80 Kl lakluh niin petrol hi 82 Kl lakluh a ni a, LPG lakluh zingah trip khat hi Kolasib Mizofed chan tur a ni.

Hetihlai hian Food, Civil Supplies & Consumer Affairs department chuan tunhnai khan hriattirna tichhuakin, tunlaia ruahsur nasa vangin hmun tam takah kawngpui ping mah se, buhfai chhek khawl dinhmun a that avangin thlaphang lo turin mipui an chah.

FCSCA department chuan, buhfaiah manganna tur a awm lo tih tarlangin, "FCS&CA chuan fur laia tlawhpawh that theih loh khuaah buhfai (monsoon stock) chhek khawl tawh a ni tih leh, heng khuaahte hian buhfaiah thlaphânna tur a awm lo a ni tih a hriattir a, fur vanga mipuiin buhfai an tlakchham lohna turin theihtawp a chhuah zel dawn a ni," an ti.