ZALEN May 9, 2025; Serchhip police te chuan document lem (tribal certificate) siamtu a puh manin, thubuai siamsak a nih hnu-ah May 7, 2025 khan Serchhip district jail-ah dah a ni.

Tunhnai khan Serchhip district chhung Keitum khuaa mi pakhat chuan Serchhip DC office-ah Aadhar Card lak a tum a, hemi atana tribal certificate a thil tel chu a lem (fake) nia rinhlelh a nih avangin Serchhip DC office-a SDO (Sadar) chuan Serchhip police station-ah FIR a thehlut a, Serchhip police ten an chhuizui hnuah dan dik lo a thil tih a awm ngei nia hriain thubuai an ziaklut. An chhuizui hnuah he tribal certificate hi a lem ngei a ni tih finfiahin, tribal certificate lem siamtu nia hriat C Zosangpuia (46), Keitum Venglai chu manin thubuai siamsak a ni.

Thu lakna Lenkawlin a tarlan danin, tribal certificate lem siamtu a puh C Zosangpuia hi tunhma pawhin Serchhip DC office a thawk tawh thin niin, document lem kaihhnawih avangin a hna atangin ban a lo ni tawh a, Common Service Centre (CSC) license neiin, Keitum khua-ah hian CSC kaltlang document pek chhuah theih hrang hrangte dan angin a pechhuak thin. Tunhnaiah an khuaa mi pakhat, ramdanga hnathawk a kal tur chuan Aadhar Card mamawhin, hemi kaihhnawiha hman tura tribal certificate lem an siam chu manchhuah a ni ta a ni.

Serchhip police te chuan tribal certificate lem an siam hi Keitum khuaa mi bawk a nih thu an sawi a, CSC kaltlang hian tribal certificate hi Rs. 50 a siam tir thin a nih thu leh tuna a lem hi pakhat Rs. 120 a siamtir a nih thu an sawi.