ZALEN July 15, 2025: Adviser to Chief Minister TBC Lalvenchhunga, Aizawl West I bialtu ni bawk chuan a bial chhunga sawrkar school enrolment pung tam ber te hnenah a MLA fund atangin lawmman nuai khat ve ve a pe. Lawmman hlanna inkhawm hi ama office-ah buatsaih a ni.

Aizawl West I bial chhungah hian Primary school zing-ah ‘Govt. Primary School II, Sairang’ chu 24% enrolment in an pung a, he biala punna sang ber niin cheng nuai khat hi an dawng a; middle school zingah enrolment punna 50% nei ‘Govt. Middle School-II, Tanhril’ in lawmawm cheng nuai khat ni an la bawk a ni.

TBC Lalvenchhunga chuan Aizawl West I huam chhunga sawrkar Middle school leh Primary school te enrollment kum hmasa lam atanga teha kumin academic year-a, zirlai enrolment pung tam ber te hnenah a MLA fund atangin nuai khat ve ve a pe a ni.

Lawmman a siam chhan sawiin, a bial chhunga zirtirtute inkarah inelna thianghlim awm se a duh thu te, naupang school kal lo te huikhawm a, school kal tir tura zirtirtute an tan theih nan te leh sawrkar school, a phu tak tak ten inthawmthatna an neih theih nan a buatsaih thu a sawi.

Adviser to CM chuan, school enrolment intihsiakna chu, kum hmasa academic year tawp dawnin Education Dept kaltlangin school intihsiakna anga neih a nih tur thu school tin te hnenah thehdarh a ni tih a sawi a. Lawmman dawng tur pawh hi Education Dept admission information hmanga duan a nih thu a sawi a ni.