ZALEN June 30, 2025: Public Works Department Minister Vanlalhlana chuan vawiin khan NH-6 (Vairengte-Sairang) kawng siamthat leh enkawl chungchangah National Highways & Infrastructure Development Corporation Limited (NHIDCL) hotute leh Mizoram Tipper Association (MTA), Kolasib Sub-Headquarters aiawhte a kawm.

PWD Minister chuan Vairengte leh Sairang inkar kawng chu kum 2020 khan Ministry of Road Transport & Highways (MoRTH)-in NHIDCL kutah a hlan tawh tih sawiin, hetih hunlaia NHIDCL-in a lak theih loh chhan PWD hnathawh laklawh lai chu nikumah thawh zawh niin, NHIDCL kutah a awm tawh a ni, a ti a. 

National Highway chu MoRTH ta a nih thu sawiin, kawng siam leh enkawl zuina senso atana sum pawh MoRTH-in a tum thin a, a enkawl tur pawhin BRO/PWD/NHIDCL a ruat thin a ni, a ti bawk. 

PWD Minister Vanlalhlana chuan NHIDCL in hma an lak zui mai loh avangin Mizoram sawrkar chuan lirtheite an tlan hram hram theih nan tiin helai kawng enkawl nan hian nikum financial year-ah cheng nuai 200, kuminah cheng nuai 111.74 a seng tawh tih a tarlang bawk.

Inkawm honaah hian pawimawh leh tul hrang hrangte sawiho niin, he kawngpui hi NHIDCL hnuaia awm a nih thu leh MPWD in hemi atan hian Central atangin sum a hmuh theih tawh loh thu tarlan a ni a. NHIDCL kawng enkawl lai siam mekna atana sawrkar a insen lai hian, a that theih loh avangin MTA te an hnatlang a. Resource-in a daih tawh loh avanga MPWD hnena boulder trip 50 ngaihtuahsak tura an dilna chu PWD Minister chuan a ngaihtuahsak tur thu a sawi a ni.