ZALEN June 28, 2025 : Mizo Zirlai Pawl Headquarters, Lunglei chuan Mizorama Diploma Engineer zir theihna hmasa ber Mizoram Polytechnic Lunglei court order-a a vawihnihna atana kalh sak leh an ni chu pawi an ti a, buaina hi chingfel turin Mizoram Sawrkar an ngen.

Mizoram Polytechnic Lunglei Students Union te’n June ni 27, 2025-a an press release tih chhuaha an thil phût an tarlante a rang thei ang bera Mizoram Sawrkarin tih hlawhtlinsak turin MZP Hqrs., Lunglei chuan Sawrkar a ngen a. Zirna in tan hun July ni 9, 2025 hma ngeia Mizoram Polytechnic Lunglei buaina hi chingfel turin Mizoram Sawrkar an ngen nghal bawk a ni.

Mizoram zirna in pawimawh Mizoram Polytechnic Lunglei buaina chungchanga Sawrkarin hma a la chak tawk lo leh buaina ching fel tura hun tiam pek chhung pawha thuneitute lam atanga ngaihven a hlawh lo chu MZP chuan pawi a tiin zirlai tam takin an tuar hmaa hma la vat turin Mizoram Sawrkar a ngen a ni. Mizo Zirlai Pawl Headquarters, Lunglei chuan Mizoram Polytechnic Lunglei hawn anih leh vat theihna atan theih tawp chhuahin, a tawp thlengin hma lak chhunzawm zel an tum.

Polytechnic huamchhunga ram hi Vandawngliana chuan a ram a ni tiin sawrkar a khing a, building 7 te luah man cheng 98,05,033 chu ram neitu hnenah pe turin Lunglei District Senior Civil Jugge chuan Mizoram sawrkar a hriattir a, pawisa hi pek mai a nih loh avangin November 12, 2025 ral hma a pe turin a hriattir nawn leh a, zirlai exam lai a nih avangin ni 90 hun pek belh niin hun tiam chhunga sawrkarin a ba hi a la pek loh avangin nimin khan building pasarih chu kalh a ni leh ta a ni.