Aizawl: Mizoram kawtchhuah hrang hrangah Conoravirus / Covid-19 vei endik hna thawh chhunzawm zel a ni a, tun thlengin he natna hrik kai hmuh an la awm lo a, State Refferal Hospital, Falkawn a he natna vei nia hriat enkawl pawh a result hriat tawh a niin, a vei lo tih chian a ni tawh.

SRH, Falkawn-a hun eng emaw chen enkawl ni tawh, a hrana enkawl thin pawh a result hun eng emaw chen tihkhawtlai a nih hnuah he natna hi a kai lo tih hriat a ni a, anni bik hi H1N1 pawh test niin he natna lakah hian a filhlim bawk.

China lama Mizo hnathawk leh lehkha zira awm, India sawrkarin a han phurh haw zinga tel te pawh tunah hian an result hriat kim an ni tawh a, anni zingah hian he Covid 19 vei hi an awm lo a, anni hi hun eng emaw chen pawn chhuak lo tura tih niin, ‘Home quarantined’ an ni a; mahse, tunah chuan anni pawh hi pawn chhuah phalsak an ni tawh, tih Health dept. lama atanga kan thu dawnna chuan ZALEN a hrilh.

Tunah hian Mizoram ramria luhna Tlabung khaw chhunga hmun hnih, Khawthlangtuipui kamah screening point pahnih hawn belh a ni a, Kawrpuichhuaha lo awm tawh sa tiamin, India leh Bangladesh inrina dep Tlabung leh a chhehvelah screening point pathum hawn a ni tawh a, hemi hma hian Zokhawthar, Kanhmun, Vairengte, Thingsai leh Lengpui ah te pawh dah a lo ni tawh a ni.

Ningani khan Bhutan-ah kum 76 a upa American tourist chu Coronavirus (Covid-19) a vei tih hmuhchhuah a ni a, ani hi March 2 khan Guwahati a thleng a, Paro International Airport, chu Drukair flight KB241 hmangin Bhutan hi a lut a ni.

He natna vei hian February 21 atang khan India ram hmun hrang hrang a fang kual a, February 18 khan Washington DC atangin India hi a rawn pan lirtheiin Thimpu, Bhutan hi an pan a, hetah hian a nupui kum 59 nen mi 10 an chuang a, an zinga 8 hi India khua leh tui an ni. Anni pahnih bakah hian an hnimhnaih deuh lirthei khalhtu leh tour guide te chu he Covid-19 enkawlna tur bika siamah quarantined nghal an ni a, Indian passsenger te pawh hi a hranpa a khung hran nghal an ni.

Guwahati-a he tourist thlenna Radisson Blue Hotel chuan an hotel floor hnihna chu an tiruak nghal a, anmahni lo buaipuitu hnathawk mi 20 te chu tunah hian enthlak mek an ni. Jorhat chu IndiGo thlawhna hmangin a thleng a, Kaziranga leh Majuli te a tlawh hnuah tunah hian a natna an hmuchhuahna, Bhutan-ah enkawl mek a ni.

• Nagaland lamah pawh China atanga hawng he natna kai hmuhchhuah niin social media ah a thang a,hei hi dawt thuthang niin Nagaland journalist te chuan ZALEN an hrilh a, FIR thehluh a ni tawh bawk.
• Nagaland sawrkar chuan UGC thuchhuak angin ni 7 khan thuchhuahin sawrkar leh mi mal sikulah te hand sanitizer daha hmang turin thu a chhuah tawh bawk.
• India khawpui ber Delhi-ah chuan puipunna liantham huaihawt an khap a, Pawl 5 chin hnuai lam chu March 31, 2020 thleng chawlh an pe a, exam hrang hrang pawh a hun sawn tlai a ni.
• China chuan he natna enkawlna tur Vaccine chu April thlaah hian hman theih tura chhawpchhuah hman an beisei thu an sawi. He damdawi hi ran-ah chuan enchhin tawh niin a him tawkah an ngai.