ZALEN June 1, 2025 : Mizorama thil thleng ngai lo tak thlengin khaw awm danin a zir loh em avangin kohhran eng emaw zatin Pathiannia inkhawm hrang hrang chu an thulh.

ZALEN-in a hriat theih chinah naupang lam inkhawm thulh an awm nual a, kohhran puma inkhawm thulh pawh an awm a. Kohhran thenkhat chu tun hnai ruah sur nasa avanga an biak in leh a vel him loh vanga hetianga thutlukna siam ta an ni hlawm.

Aizawla Hunthar Presbyterian Kohhran chuan Pathianni tuk khan an member-te hnenah hriattirna tichhuakin khaw awm danin a zir loh em avanga Naupang Sunday School bik chu inkhawm loh turin an ti a, Puitling Sunday School erawh inkhawm awmin dan anga hming lam erawh a awm loh tur thu an puang.

Dawrpui Vengthar Presbyterian Kohhran chuan NPSS lama Primary leh Senior Department zawng an inkhawmtir lo a, College Veng Presbyterian Kohhran pawhin NPSS zawng inkhawm chawlh an puang bawk.

Hmar Veng Presbyterian Kohhran, Lungdai chuan naupang lama Pre Beginner atanga Junior Department inkar inkhawm chawlh an puang a, kohhran committee-in inkhawm ang veka ziah luh turin rem a ruat.

Serchhip-ah pawh Biakinpui Kohhran, UPC (North East India) chuan church board-in a rel angin Pathianni chhun leh zan inkhawm an thulh tih an puang a. Baptist kohhrante pawh inkhawm thulh an awm nual bawk.

Mizoramah hian khaw awm danin a zir loh avanga kohhranin inkhawm a thulh hi a awm ngai lo hle a, sorkar thuneitute erawh chuan sikul chawlh a lo puang fo tawh thin a. Tun hnai ruah sur nasa avang hian Ningani leh Zirtawpni khan district eng emaw zatah sikul chawlh puan a ni.