ZALEN June 17, 2025 : Rulchawm khawtlang mipui te chuan HS zirtirtu Rebeck K. Lalnunhlimi, Saitual DPO (Samagra) Office a June ni 3 a transfer Order chhuak chu duh lovin, Headmaster in Release Order a pek chu khawtlang mipuiin an lak sak.

Rulchawm khawtlang hruaitu VC, YMA, MHIP, MUP leh RSU ten Bialtu MLA, Minister ni bawk Pu Nitea hnenah ziakin an lo thlen tawh a. Bialtu MLA hian Education Minister hnenah pawh a lo thlen tawh niin an sawi.

Vawin, June ni 17 hi DPO lama a Joint hun tur a ni a, Rulchawm HS Headmaster in Release Order a siam chu khawtlang mipui ten an laksak a, Rebeck-i hi a aiawh emaw tal dah a nih loh chuan an khaw HS zirtirtu atang hian chhuah an tum lo niin thu kan dawng.

PC Andy Lalhmangaihsanga, YMA Secretary chuan "Kan khawtlangin zirna kawngah hma kan sawn chho ve mek a, zirtirtu tha tak Sawrkarin min pe te hi kan lo lawm tehlul nen, hetianga kan zirtirtu hmun danga dah chhuah leh daih hi kan ui a, kan Sawrkar hotu te hian min ngaihtuah nawn sak se kan ti" a ti.

VCP K Lalremmawia chuan "Rebecki hi kan HS atanga a chhuah hi kan phal lova, tuna Headmasterin Release Order a chhuah hi Rulchawm mipui aiawhin VCP ka nihnain ka kawl dawn a, Rebecki aiawh tur tal min rawn pe a nih loh chuan kan khaw HS atangin a chhuah kan remti dawn lo. Chu chu Rulchawm khawtlang mipui duhdan a ni" tiin a sawi.

Rulchawm HS ah hian Mathematics zirtirtu a hranin an nei lova, Headmasterin Mathematics a zirtir a, zirtirtu an indaih tawk chiah a, Rebeck-i an lakchhuah chuan zirtirtu an indaih lo nghal dawn a ni.

Vawin chawhnu khan Rulchawm khawtlang hruaitute kalkhawm chuan Pi Rebecki Release Order hi HS Headmaster Office ah a huhoin an han chhuhsak a, VCP hian a kawl nghal.