ZALEN July 6, 2025 : Excise & Narcotics Department (END)-in Aizawl dai hnai - Rangvamual, Phunchawng leh Tuikhurhlua zute a zirchianna chu enfiah mek zel a la ni a, tun dinhmunah peih fel a la ni lo.

END hotute hnen atanga ZALEN thudawn danin heng hmuna zute hi mihring hriselna tana a hlauhawm dan hriat chian a nih theihna atan Delhi-ah a sample an test-tir a, chu result chu an dawng tawh a, result hi zir belh mek a la nih avangin mipuiah puan zar theih a la ni lo.

Kumin March thlaa assembly session-ah khan END minister Lalnghinglova Hmar chuan Mizorama zu hlauhawm nia sawite mihring tana a hlauhawmzia chipchiar taka pho lang turin Delhi-a Central Laboratory-ah endik tura hmalak a nih thu house a lo hrilh tawh.

Excise minister chuan Aizawl chhehvela zu hmunpui nia sawi, Rangvamual, Phunchawng leh Tuikhurhlua zute chu dan phal lohva siam leh zawrh vek a nih thu leh heng zu siam leh zuarte bakah a inte chu dan tlawhchhana man zel an nih thu a sawi.

Mizorama zu siam chhuahte chu nunna atan a hlauhawm bik nia sawi a awm avangin zu sample chu New Delhi-ah zir chiantir a nih thu a lo sawi tawh bawk.