ZALEN May 15, 2025 : Mizoram Fisheries Department leh ICAR-CIFRI, Kolkata te tang kawp chuan vawiin khan 'Awareness cum Input Distribution Programme for popularization of ornamental Fisheries in schools of Mizoram' tih an buatsaih chu Fisheries Department conference Hall ah hman a ni.

He programme hi Mizoram chhunga school naupang te hnenah Bawma khawi sangha chungchang tih larna tur leh sangha te hlutna inzirtirna tura buatsaih a ni. He hun hi Lalthansanga, Fisheries Minister in Khuallian niin a hmanpui.

Inlawmna thu sawiin Laltleipuii, Fisheries Director chuan Aquarium- sangha khawi chu mihring te rilru hriselna leh hlimna atan a pawimawh thu te, natna thenkhat tan phei chuan damdawi tha tak a nih thu leh he programme in school naupang te ah tui chhunga nungchate ngaihven leh enkawl te, venhimna tura mawhphurhna te an zir chhuah ngei a beisei thu a sawi.

Fisheries Department Secretary Er. Lalrothanga pawhin thu sawiin, CIFRI chu research institution a nih angin Mizoram luia ornamental fish awm ang ang te dap chhuah a, zirchiang tur leh tlang Ram chheng chhe zawka sangha dil siam dan tha zawk te zirchian sak turin CIFRI hotu te chu a ngen bawk a ni.

Khuallian chuan CIFRI hmalakna avanga lawmthu sawiin, he programme hian Mizoram chhunga school naupangte ah kan chhehvel nungcha leh tui chhung a cheng thil nung te ngaihven tharna leh ngaihhlutna a pek thar ngei a beisei thu a sawi a , School tam zawkah hetiang programme hi kalpui zel a duhawm thu a sawi bawk. School aiawh kal te hnenah pawh vawiina an thil dawn te chu uluk taka enkawl zui a, zirlai naupang te tan zirlai tha tak, min hual veltu boruak leh nungcha te pawimawhna leh venhim nachang an zir chhuah theih ngei na tura tan la turin a chah bawk a ni.

Dr. Sullip Kumar Mahji, Principal Scientist and Head, CIFRI, Guwahati pawhin thu sawiin, ICAR-CIFRI, Kolkata bul tumin hetiang proramme hi Norh East state hrang hrangah an lo kal pui mek thu sawiin, zirlai naupang te hnenah Ornamental fish te ngaihven leh ngaihhlut tir a, nungcha te chunga rilru hrisel put leh venhim an tul zia zirtir a, Mizoram ah sangha khawiin kawng hrang hranga hma a sawn theih na tur a buatsaih a nih thu a sawi.

He hunah hian Mizoram chhunga School thlan chhuah 50 te hnenah Fibre glass hmanga siam Aquarium bakah a kaihhnawih sangha leh thildang te Minister hian a sem a ni. Tin, chawhnu lamah Aquarium enkawl dan te CIFRI mithiam te’n zirtirna an pe nghal bawk a ni.