ZALEN July 2, 2025; Hnahthial District Bualpui ‘H’ khua Kawnpui rama Saphai hmuh chu Environment Forest & Climate Change Department (EF&CC) Thingsai range a thawktuten an man.

June ni 29, 2025 Pathianni khan Saphai entu zing mi pakhat a hliam avangin Divisional Forest Officer (DFO)North Vanlaiphai Forest Division thupek angin EF&CC Department Thingsai Range Office a thawktute leh Bualpui ‘H’ khawtlang hruaitute hmalaknain June ni 29 zan thim hlim khan Saphai hi manin Thingsai lamah phurh phei a ni a. Range Officer (RO) quarter-ah dah niin, June ni 30 chawhma dar 10:30 khan khan ama tana himna tur ber nia an hriat Khawnglung Wildlife Sanctuary a dah tura phurh niin chhuah nghal a ni tih Thingsai EF&CC Range Officer H. Lalengmawia’n a sawi.

Kar hmasa Ningani khan pa zawng a kal ten Saphai hi hmuin Sakhi emaw, Sanghal emaw a dawlh ngei niin an hria a. Kar hmasa Inrinni khan Bualpui 'H' VC leh EF&CC Department Thingsai Range a thawktute nen a hmun a kalin an enfiah a, Saphai sei zawng hi teh niin feet sawm pahnih leh inches riat (12ft 8inch) a sei a ni.