ZALEN April 16, 2025 : MPCC Treasurer Dr. Lalmalsawma Nghaka chuan vawiin khan Sairang-a FCI Godown-a Mizoram sawrkarin Sawhthing a lei khawm sa an dah chu a hmunah tlawhin a enfiah. Sawhthing dah khawmna hmun chu a lei tu tur ten bawrin ri hut hut tura beisei a nih laiin, a reh thuap mai niin a sawi.

Dr. Mala chuan, "Sairang FCI Kudam pawh vawiin ni thlengin lak khawm sa pawh hralh chhuah loh niin, Kudam a la khat vek a. Sawhthing dah sa pawh tam tak an ro tan mek a, tam tak in buara chhung ah zung an thlak tan mek a ni. Sawhthing dah khawmna hmun chu a lei tu tur ten bawrin ri hut hut tur a beisei a nih laiin, a reh thuap mai a ni."

"District hrang hrang a collection centre te dinhmun pawh Sairang FCI Kudam dinhmun ang tho an ni tih ka hre leh zel a, chuvangin sawrkar hi che vat turin kan phut tlat a ni," a ti.

MPCC Treasurer chuan, "ZPM in inthlan hma a intiamna ringin kuthnathawktu tam takin sawhthing an ling a, a chawh a lo hun chho a, mangan na khurah an lut mek a ni. Tunah hian Sawhthing chingtute Mizoram dung leh vangah an mangang tawh."

"Khaw tam takah sawhthing chawh sa an dah nghek nghuk a, hralhna a awm si loh avangin an chawh belh ngam tawh lo. Chawh loh in ramah a tam zawk a la awm bawk. Sawhthing hralhna hun a tlem telh telh a, kuthnathawktuten thlawhhma an lak a ngai bawk nen, hun an nei tlem tawh hle a, sawrkar hi a chet vat a ngai a ni," a ti.

Dr Mala chuan Finance Minister leh Chief Minister ni bawk Pu Lalduhoma'n December ni 11, 2023 khan SEDP sum bang atangin Thlaithar lei nan Vaibelchhe 110 dah a nih thu a sawi a. Kum 2024-25 Budget ah Hand Holding Policy tan Vaibelchhe 200 dah a ni leh a. Kum 2025-26 ah Handholding Policy a tan Vaibelchhe 350 dah leh a ni. Chuvangin sum an nei in an hria a, an duh chuan an lei thei ah an ngai.

"RTI a lan dan in Sawrkar hi sawhthing lei nan Vaibelchhe 38.2 vel chauh an la seng tih kan lo hria a. Ruah a tla tan tawh a, Sawhthing chawhna hun a awm tawh mang lo a ni, he hun tlem te awmah hian sawrkar hian tan la in, kan kuthnathawktuten an thar chhuah sawhthing te hi a bo a bang awm lovin a sum faia lei sak nghal turin kan phut a ni," a ti.