ZALEN June 19, 2025: Empowred Committee on Investment leh sawm bik te chu vawiin khan Chief Minister Lalduhoma hovin CM office-ah an thukhawm a. An thutkhawm hmasaa an thu rel bawh zuinate an thlirho, sawrkarin duh dan zawm thei company chauh MoU ziahpui tawh ni se tih an rel.

Lalduhoma chuan, "Tunhmain sawrkar lam chan chhe tur sa rana Company te nena MoU ziah a lo awm tawh thin. Sawrkarin sum a chawi fo va, han bantir (terminate) duh pawha ban hleih theih loh MoU te pawh a awm. Hetianga sawrkar lam chan chhe sa rana MoU ziah hi kan sawrkarah hian awm tawh lo se kan duh a. Sawrkarin a chhiatpui loh tur, kan duh dana MoU kan ziahpui theih chauh hi inremna siampui ila, a thei lo chu ziahpui lo mai ila, tih hi kan rilru a ni," tiin sawrkar ngaihdan a sawi a. Zirchianna report an ngaithlain an sawiho.

He committee hian June ni 11 khan Sawhthing leh thlai dang processing unit rawn din duh company pathumte draft Memorandum of Understanding endiktu tur mi a ruat a. Company te draft MoU hi sawrkar tan pawm vek theih a nih hmel loh avangin sawrkar duh dan chiang taka tarlanna (Expression of Interest) siam ni se, company te hi hriattir thuai ni se, a tul chuan company dang pawh hriattir ni se, an ti.

Mizoram Industrial & Investment Policy thlirhona an nei bawk.