ZALEN May 19, 2025 : ZPM General Headquarters chuan vawiin khan an Party Office-ah chhung inkhawm an hmanga, he huna thusawitu Chief minister Lalduhoma chuan, Sawrkar hna lakah a thiam leh tlingte lak an nih zel tur thu a sawi.

Chief Minister Duhoma chuan, “ZPM Sawrkar hnuaia hnathawh reng reng a tha tur a ni a, mipuiin beiseina sang tak nen min thlir a ni tih hriain, Contract hna a ni emaw, MLA Fund hmanga hnathawh reng reng kalphung thar mipui Sawrkar hnuaiah chuan a tha bik tur a ni."

"Hna endiktu tur Party hrang hrangte awmna Mizoram State Monitoring Committee kan dina, anni hian rim takin an thawk mek a, hna tha lo te chu a tul anga action lak a ni a, kan la zel bawk dawn a ni. Tin, sawrkar hna lak chungchangah pawh a thiam leh tlingte chauh kan la zel dawna, kan thalaite pawh taima taka lehkha zir tur leh thiamna tak tak neia kan ram tana mi chhenfakawm ni turin ka chah a ni,” a ti.

Duha chuan, “Zoram mipuiin Sawrkar thara rinna leh beiseina thar an nei hi lawmawm ka ti a, hei hian chakna min pe thin a ni. Famkimlo ni mah ila, kei leh ka thawhpuite nen theih tawp chhuahin kan ram tan chawl lovin hna kan thawk mek a, kan ramin hmasawnna hmel thar a hmu chho mek hi thinlung takin kan lawm em em a ni."

"Ram rorelnaa Pathian ram tundin tumtu Party kan ni a, tlang hrang hranga kan lungrualpuite pawhin rilru thianghlim leh ram hmangaihna thinlung chhawm nung zel turin ka chah a, keini Party lo hi zoram mipuite hian innghahna an nei tawh lo tih hriain, mahni hmun theuhah thahnemngai taka ram tana thawk zel turin ka chah a ni,” a ti bawk.