ZALEN June 3, 2025 : Mizoram state pumah ni eng emaw zat ruah nasa tak a sur avangin chhiatna hrang hrang, leimin, lungrem chim, lung tla, tuilian leh saberekakhuangkaih te a thleng a, nunna chan phahte an awm bawk. He khuarel chhiatna thleng mek avang hian District hrang hrangah mipui nunphung a buai phah nasa a, Sawrkar chuan Mizoram rawn tlawh tumte chu June 13, 2025 ral hma chu rawn tlawh lo turin ngenna an siam.

District tina Deputy Commissioner-te kaihhruaina hnuaiah District Disaster Management Authority (DDMA) te chuan chhiatna thlenna hmun te urhsun taka vilin chhiat tawkte chhawmdawl hna ngawrh takin an kalpui mek zel a. Hetiang hi thil awmdan a nih avangin District-a hruaitute chuan ram pawn atanga VIP lo zinte pawh, lo mikhual leh lo dawnsawn kawngah harsatna an tawk a ni.

Indian Meteorological Department (IMD), Regional Meteorological Centre, Guwahati-in a puan lawk danin, thlipui leh ruahpui thawk reng thei dinhmunah Mizoram chu a lan avang leh chhiatna thleng mek leh thleng zel theite thlirin, mipui him tlan zawk nan Mizoram sawrkar chuan, sawrkar laipui leh state dang atanga mi pawimawh lo zin turte chu, June 13, 2025 hnulam hun remchang dang lo ruahman hram turin a ngen a ni.

He thu chhuah hi mitinte kan him tlan zawk theihna tur leh chhiatna thlengte tih ziaawm leh chhanchhuah leh chhawmdawl hnate chak zawka hlenchhuah a nih theih nan liau liaua chhuah a nih thu sawrkar thuchhuak chuan an tarlang.