ZALEN June 23, 2025: ZPM party chuan vawiin khan chhung inkhawm Party Office-ah an hmang a, Agriculture & Farmers Welfare Minister PC Vanlalruata chuan thu sawiin; thlai thar market buaipui tak tak tur chuan thlai bawh bik kan neih a ngaih thu a sawi a, nakkum atangin hmunphiah ro chu grade sawi lovin sawrkarin a lei dawn thu a sawi bawk.

PC Vanlalruata chuan, “ZPM sawrkar hi a lo din tirh atanga vawiin thlengin Zoram mipuite tan a ding reng a, ‘Sawrkar hnathawkten min dem mai ang’ tih hlau chungin aikal lak kan titawp a. Sum leh pai tam tak sen a ngai dawn tih hre reng chungin thlai thar lei kan buaipui mek bawk a ni. Thlai thar lei chungchangah hian kan Chief Minister a fakawm tak zet a ni. Sum leh pai harsatzia leh Sawhthing rate chhiat ber kum a ni tih hre reng chungin Kuthnathawktute tihbeidawn a duh lo a, a department changtu Minister ka nihna ang pawhin ka lawm a. Zoram kuthnathawktute lawmthu sawina pawh ngaihthlak a nuam hle a ni,” a ti.

Agriculture Minister chuan, “Sawrkarin direct-a Sawhthing a lak zat hi Qtl. 94,160 a ni a, support price a pek zat hi Qtl. 1,21,740 a ni tawh. June ni 21, 2025 thlenga Sawhthing lak tawh zat belh khawm chu Qtl. 2,15,900 a tling tawh a. Sawhthing rate chhiat ber kumah pawh sawrkarin cheng vaibelchhe 85 chuang a seng tawh a ni. Hmunphiah chungchangah Empanelled Firm ten sawrkar rate anga lei turin an intiam a, an intiam anga an kal leh tak loh avangin kan bul tanna a fuh hlel deuh hlek a, chuti chung chuan ZOHANDCO kal tlangin kumin March thla chhung khan Sawrkarin Kg. 2,49,828 a lei a. Kum a lo thar ang a, hmunphiah ro chu grade sawi lovin sawrkarin a lei dawn a ni,” a ti.

“Sawhthing bikah hian Siliguri pel lovin Mizoten kan lo hralh nasa hle mai a, Bagha vai kan pek te pawh hian Siliguri thleng an phur a, chuta tang chuan buyer lian ten an lo la chhawng ve leh thin. Kumin atang chuan phai buyer lian ten Mizoram Sawhthing an hre chho tan ve ta hi a lawmawm hle a ni," a ti bawk. 

PC Vanlalruata chuan, “Tunlaia sawi hlawh em em Mizoram Universal Healthcare Scheme (MUHCS) pawh a rei tulh tulh ang a, mipuiten kan la chhawr dawn chauh a ni. Mizoram University pawh a din tirhin mi in hnuai luah ten hun an hmang a, vawiinah chuan India rama University tha thlan chhuahah a hming a lang ve tawh a ni. Kan sawrkar pawh mipuite tana tha ber tur a nih chuan huai takin a kal zel dawn a, Healthcare Scheme pawh eptuten sawiselna tur zawng nasa hle mah se, a chhawr mektu leh la chhawr tangkai zel tur mipuite kan thlir a, mipuite lamah sawrkar a tan avangin hnung tawlh lovin kan kal zel dawn a ni," a ti.

Party mipui kalkhawmte fuihin, "He sawrkarah hian mimal hamthatna tur leh hlawkna um ringawt te tan hmun a awm lo a, kan Minister te leh MLA te zingah mahni tanghma hai ka hmu lo a, party mite pawhin Zoram damna tur hi thlir turin ka duh che u a ni,’’ a ti bawk.