ZALEN July 7, 2025 : ZALEN July 7, 2025 : School Education Department chuan vawiin khan Directorate of School Education Conference Hall-ah common school uniform, school calendar, leh school timing chungchang sawihona leh vantlang inrawnkhawmna hun, 'Public Consultation Meeting' a buatsaih a, he sawihona thutlukna siam tur hi department ni lovin sawrkar thuneitute kut a nih thu Education Director chuan ZALEN a hrilh.

School Education Director Angela Zothanpuii chuan Public Consultation Meeting hi uapin kalkhawmte hmaah thupui sawiho tur chanchin tlangpui leh inkohkhawm a nih chhan a sawi hawng a, School Education Director chuan he’ng thupui sawiho tur chungchangah hian an department hnenah ngaihdan ziaka thehlut tawh 200 chuang an awm thu a sawi a. Sawrkarin policy tha tak a duan dawn chuan a hmangtu turte ngaihdan hriat a pawimawh tih a sawi a ni. 

School Education Director Angela Zothanpuii hnen atanga ZALEN thudawn danin he inrawnkhawmna atang hian an department chuan mi hrang hrang ngaihdan chu lakhawmin an thlir ho leh ang a, chumi atanga an tehkhawng chu sawrkarah an thehlut ang a, thutlukna chu sawrkar siam tur a nih thu a sawi.

Sawihona hunah hian Department hotute bakah, Rev. Dr. K. Thanzauva, School Education Department Consultant; State Council of Educational Research and Training (SCERT); Mizoram Board of School Education (MBSE); Samagra Shiksha; Information & Public Relations (I&PR) Department; Higher Secondary School Lecturers Association Mizoram (HISSLAM); Mizoram Education Inspecting Officers’ Association (MEIOA); Mizoram Independent Schools Association (MISA); Mizoram Secondary School Teachers’ Association (MISSTA); Mizoram Journalists Association (MJA); Mizoram Primary Teachers’ Association (MPTA); Middle School Teachers’ Association (MSTA); Mizoram Zirlai Pawl (MZP) aiawhte leh he’ng thupui chungchanga ngaihdan sawi duhte an tel a ni.