ZALEN May 17, 2025 : Assam Rifles leh Custom Preventive Force Department, Champhai ten Kelkang-a Heroin No. 4 Hawng 219, Kg 2.5 a rit an man chungchangah Kelkang VCP chuan he thilah hian an khaw mi an inrawlh lo tih ZALEN a hrilh.

ZALEN-in Assam Rifles atanga thu a dawn a ziah chungchangah Kelkang khaw mi te demna ang deuhin social media -ah comment chhe tak tak a awm a, Kelkang khaw mipuite chuan hrehawm an tih thu leh an rilru a nat thu an VCP chuan ZALEN a hrilh a, he No 4 manah hian an khaw mi an inrawlh loh thu a sawi.

Kelkang VCP T. Lalengliana chuan, "15.5.2025 Ningani a Assam Rifles leh Custom Preventive Force Dept, Champhai te Joint Operation-in No 4 hawng 219, Kg 2.5 an man chungchangah hian Kelkang mipuite inhnamhnawihna an nei lova, Assam Rifles te hian report an dawn bawhzuiin Custom te nen Joint Operation hi neiin No 4 neitute hian Kelkang ram chhung Khankawn-ah an thukru a, a neitute hi an tlanbo a, No 4 hawng 219, Kelkang ram chhunga man thuah hian Kelkang mipuite tumah an inhnamhnawih lo a ni," a ti.