Aizawl: I&PR Minister Lalruatkima chuan, "Kan dam khawchhuahna turin taima takin kan beih a ngai a. Mimal, khawtlang leh ram leh hnam dinchhuah nan kan taimak lehzual a ngai a. Taimakna hian hlawhtlinna a si thlu thin a ni," a ti

Nimina Kanan Branch YMA in an dincham Rising Day lawmna bakah zirlai hlawhtlingte chawimawina, Golden Jubilee logo tlangzarhna leh Golden Jubilee khuhhawnna hun Kanan Multipurpose Hall-a neih a hmanpuina ah he thu hi sawiin Lalruatkima chuan hun khirh leh harsa an tawk thin chunga Pathian hruainaa Golden Jubilee hmang mai tura Kanan YMA ten inbuatsaihna an kalpui thei chu lawmawm a tih thu a sawi.

Ruatkima chuan, "Eng dinhmunah pawh ding ila nu leh pate kan zah tur a ni a, kan lei Pathian an ni," a ti a. "Engkim thawk turin lehkhathiam a pawimawh tawh a. Ranvulh, carpentary, infiamna leh loneimi ni tur pawhin lehkha thiam a pawimawh tawh a ni. Lehkhathiam chuan eizawnna kawng hrang hrang an zawhnaah taima leh rinawm taka an thawh chuan an lehkhathiamna an hmang tangkai a, dinchhuah nan an hmang thin," a ti bawk. 

Kanan Branch YMA-ah hian member 2326 an awm mek a ni.