ZALEN May 13 : Central YMA hnuaia din Cantral Anti Drugs Squad (CADS) leh Excise & Narcotic Department (END) te chuan tun hnaia TBCC atanga chhuak zingah Over Dose avanga thi pathum an awm tawh tih an sawi a, khawpui dung vela drugs addict an man thin te dahluhna a awm tawh rih loh avangin a buaithlak dawn am an mangang hle.

CADS lam chuan TBCC atanga rawn chhuakte avang hian mipui lamin harsatna an tawh chhoh ngei an rinthu ZALEN an hrilh a, zingkar lamah pawh addict vak vek khawpui chhungah an tam nghal an ti. Riahna mumal nei lo, a remchanna hmuna riak mai thin an tam avangin khawpui pawhin a tawp phah loh theih lo an ti bawk.

CADS hian ruihhlo ngai leh zuar te tan counseling an la kalpui reng an ti a, chutihrualin tun dinhmunah drug addict te erawh an man thei tawh rih lo a, hei vang hian khawpui chhungah drugs addict vei vak an tam hluai lo thei lo an ti. TBCC-ah an mi mante an chhungte phalna lo chuan an dah luh ngai loh thu an sawi a, an mi man nazawng an dah lut ngai lo an ti bawk.

END te chuan TBCC chungchang zirchiangtu tur officer an ruat thu ZALEN an hrilh a, a rawn chhuak te chevel pawh an thlithlai reng dawn an ti a, a hma ang bawkin ngawrh taka an chet a tul phah dawn a, inthlahdah thei an ni lo a, chutihrualin an mi mante an dahna thin a rem tawh dawn loh avangin chet lak a harsa dawn an ti.

END leh CADS te hian Drug addict te hi jail-a khung mai theih an nih loh avangin TBCC a dah hi an tan chuan a awlsam an ti a, hetiang drug addict te enkawlna hmun hi sawrkarin an siam thei lo anih pawhin Kohhran lam te hian buatsaih thei se tha an tih thu an sawi ve ve. Drug addict te hi thingtlang lam mi pawh an ban chuang bik lo an ti.