ZALEN June 10, 2025 : Mizoram tana Territorial Army lak tur chu July thla atang hian lak tan a ni dawn a, sipai lak turah hian Sipai bang leh an fate bakah Infiammi hlawhtlinna lo neih tawh te tan tehfung thlahdul sak an ni dawn.

Territorial Army dinna tura Mizoram sawrkarin hmala tura a ruat Lt. Colonel Clement Lalhmingthanga tun tuma an sipai lak turah Sipai bangte leh an fate bakah Infiamna lama hlawhtlinna lo nei tawh te chu tehfung an neihah vannei thei an ni tih a sawi a, heng sipaite hi July thla-a lak tur an ni a, lak hun tur tak la sawi theih a ni lo a ti.

Home & Hearth Mizo Territorial Army te hi Company hnih din tura ruahman niin, a thawh khatna atan hian Company khat lak phawt tur a ni a, anihna takah chuan Mizo hlang tur an ni. Mahse, a bul tan tur an nih avangin sipai pangngai anmahni kaihruai tur an tel a ngaih avangin Mizo hlang chu an ni rih dawn lo.

Company khatah hian mi 102 awm tur niin, Officer in Commanding pakhat, JCO pali leh Ordinary Army 97 awm tur an ni. Mahse, tun dinhmunah hi chuan Ordinary Army hi 70 vel lak tum a ni a, a bak Officer, JCO leh Ordinary Army te hi chu Army lak thar kaihruaitu tur Sipai pangai dah an ni phawt dawn a ni. Sipai te hi lak chhunzawm zel tur niin hun a kal chuan Mizo hlang zel an ni thei dawn a ni.

Dil thei chin te hi Pawl 10 pass chin, kum 18-42 inkar an ni a, heng sipai te hi Mizoram sawrkar lak tur an ni. Sipai atana lak te hi Assam Rifles Centre, Shillong-ah training tur an ni.