ZALEN April 20, 2025 : Mizoram Excise & Narcotics Department (END)-in kumin thla thum chhungin rakzu litre 18,013 leh heroin kg 15.192 an man tawh.

END tar lan danin, kumin January atanga March thla thleng khan ruihhlo chi hrang hrang man a ni a, chung zingah chuan ganja kg 84.913 manin, khuh damdawi bur 1,318, methamphetamine kg 44.111 leh crystal meth kg 48.061 an man.

Dan bawhchhia an man tawh zawng zawng zat chu mi 1,878 an tling a, tualchhung siam rakzu litre sing hnih dawn an man tawh bakah hian zu bilh lai tin 52,198 leh zu siamna bungbel 813 an man tawh bawk a, dawidim an man tawh zata chu kg 59.640 a tling.

Sap zu IMFL (750ml) um 4,453 man tawh bawkin, IMFL (500ml) IMFL (375 ml), IMFL (300ml) etc. um eng emaw zah man an nei tawh bawk a, BEDC an man tawh zat chu litre 462.200 a tling bawk.

Kumin thla thum chhunga heroin kg 15 chuang man a nih tawh lai hian, nikum 2024 chhunga END-ten heroin an man zat chu kg 46.680 a tling a. Kum 2024-a END-ten ganja an man zat chu kg 578.592 tling bawkin, methamphetamine kg 140.839 an man bawk.