- F. Lalrinfela

Ministry of Information and Broadcasting (MIB), Government of India hnuaia Press Information Bureau (PIB), Aizawl tirhin February 15 leh 21, 2026 chhung khan India rama state ralmuang ber atangin state ralmuang lo ber Kashmir khawpui Srinagar leh a chhehvel-a sawrkar laipui hmalakna hrang hrang te tlawhin ka zuk zin ve a, ram upa leh ngelnghet an nih piah lamah ram buai ni lo se, an state ropui zia tur hi a takin ka zuk hmu ve in ka hria.

Kashmir hi February 16, 2026 Thawhtanni zing dar 9:00 velah kan thleng a, hemi ni hian Srinagar-a PIB Office kan tlawh nghal a, helai hmun bawr hi Press colony tih niin, a bul velah hian chanchinbu hrang hrang office te a awm bawk a, Police hmunpui bul anih bawk avangin he colony hi luh mai mai pawh harsa tak a ni. PIB hi kan tlawh tur pawh min lo ruahmansaktute an ni a, hemi ni hian Srinagar district nena inri, Pulwama district-a Pampore khua-a awm Silk Board kan tlawh nghal a, silk hi an larpui a ni bawk a, an inti neitu hle. 

Tun hma lama sumdawnna kawng lar tak Silk Route pawh kha an silk thawnchhuah kawng a nih avanga a hming pawh pu niin an sawi. Anni hian Thingtheihmu (Mulberry) ei thin Pangang atanga silk siam chu an buaipui ber a ni a, an chhehvel hi Thingtheihmu hmun niin, mit tlin tawk he thing hi an ching a. He hmuna an hotute pahnih hi Mizoram-a lo awm tawh leh lo tlawh fo thin te an nih avangin min lo dawngsawng tha hle a, chhun chaw te min lo kilpui bakah ngaihhruina te min hlan bawk. Silk nena an inkungkaina hi a lo rei tawh hle tih a hriat a, AD 629-645 inkara India rawn tlawhtu Chinese Buddhist monk, scholar, traveller leh translator ni bawk, Hsuen Tsang pawhin Kashmir silk chungchang a lehkhabu-a a ziahlanna te pawh hmuh tur a awm.

Pulwama hming hi hriat hlawh tak chu a ni lo chungin he district hi thlai leh thil dang that duhna leh chin uarna hmun a ni a, Apple pawh an ching nasa hle a, kan kal hun hi a hnah tlak kawlh lai a nih ve bawk avangin a hmuhnawm tur angin a hmuhnawm loh thung. Pulwama district-a Bonera khuaah hian Central sawrkar hnuaia hmalakna pawimawh tak Council of Scientific & Industrial Research (CSIR)- Indian Institute of Integrated Medicine, Field Station pawh kan tlawh a, helai hmun hi Lo neitute chin tur ramhmul damdawi thlai chi hrang hrang chinna hmun leh sawngbawlna hmun a ni a, Rose hriak ringawt pawh litre khat cheng nuai 5 vela hralh tura an buaipuina thinna a ni a, thlai an chin dang Lavender, Tulip, Saffron etc. ang chi pawh hi manto tak tak niin heng an thil chin te hian rah tha zawk an chhuah theihna turin Khuai te pawh khawi tel a ni.

Kashmir-in an hmingthan pui em em Silk hmanga siam Shawl leh Carpet siamna hmun kan tlawh kha a bengvar thlak bawk a, khawvel huap pawha an larna, Kashmir Sawrkar lamin Silk a buaipui dan leh sumdawnna atana khawl-a shawl leh carpet silk hmanga siam te chu a lo danglam hle tih a hriat a, khawl hmanga siam silk te chu man tlawm tak taka lei theih tur hmun tina hmuh tur a awm laiin an shawl leh carpet ngaihhlut em em, khawvela pawhin a ngaihhlutpuite erawh hi chu mi naran a lo thleng pha dawn lo tih hi a chiang em em mai a, heng mihring kut hmanga siam shawl leh carpet te hi chu hmuh mai mai tur a awm lo a, a man tlawm ho te phei hi chu a hlutna hre lo tan chuan a lan danah phei chuan ho ang reng tak a ni.

Heng kut hmanga phiar shawl leh carpet an tah te hi a phiartu thiamna leh phiar hun chhung a zirin a man hi chhiar a ni thin. Silk la zai, Thingtheihmu leh Pashmina Beram hmul atanga siam te chu kut hmangin khawla tah a nih hnuah kut hmangin an thui par (design) ta thin a, a design siam chhung hian hun a duh hle a, kum 7 chhung an thui par shawl te pawh a awm, kum khat chhunga siam te, thla hnih khat lek siamte pawh a awm tho a, an buaipui chhung a zirin a shawl leh carpet man te hi an chhiar thin a ni. 

Kum khat chhungin shawl hi siam ta se, kum khatah ni 365 a awm a, phiar loh ni leh hasatna dang te awm thei anih avangin a buaipui chhung hi ni 300 ang vela chhut thin a ni a, hlawhfa chu thiam pangai tak a nih chuan ni khatah cheng 500 hlawh angin an chhut a, chuti a nih chuan he shawl hi kum khat chhung design se, 500 x 300 = 1,50,000 man tur tihna a ni. Chutiang zelin shawl siam hun a zirin a man tur hi an chhut thin a. Carpet pawh hetiang tho hian a man tur an chhiar thin bawk.

Pulwama district-a Pampore-ah hian khawvela spice manto ber, King of Spices tih a sawi, Saffron chinna leh sawngbawlna, India International Kashmir Saffron Trading Centre (IIKSTC), DUSSU Pampore, Kashmir chu Mizoram Journalist Association (MJA) ten kan tlawh bawk a, Srinagar kianga awm Pampore hi Saffron tana khawvela leilung that berna an tih hial a ni. 

Saffron hi IIKSTC te chuan KG 1 hi International market-ah Cheng nuai 4 chuang a nih thu an sawi, spices zawng zawngah a to ber ni a sawi a ni, India hian Russia, Czech Republic, leh Europe hmar lamah te chu an hralh hnemna ber a , kum khatah Saffron hi Metric ton 20 chuang India hian a thawn chhuak thin an ti.

Zarda-ah te bakah rimtui chi hrang hrang ei chi leh ei chi lem loh a telh thin Saffron hi Pampore ah hian packing pawh tih nghal a ni. Pampore-a an sawngbawlnaah hian gram khat bottle atanga pack tan a ni a, he bur chhunga Saffron gram khat hi Cheng 385 man a ni a, hemi atanga cheng 300 hi farmer te chan a ni a, 5% hi GST niin packing ah hian Cheng 20 lak a ni. Gram 1 atanga Gram 5 thleng packing hi an kalpui a, a aia tam pawhin an hralhchhuak thei tho.

Press Information Bureau (PIB) huaihawta kal Mizoram Journalist Association te chuan April 22, 2025 a rawlrala che thin (terrorist) ten khualzin 26 an kahhlumna Pahalgam-a Beetam Valley chu February 21 khan kan tlawh bawk a, Beetam Valley hi inkahna thlenna hmun chuan hnuai lam a ni. He hmun enkawltute bakah tourist guide te pawhin kha thil theng avang khan a hnuah tlawhtu an tam phah tih an sawi. Rawlrala che te chhan leh mumal awm lova an chetna hmun hi a takin hmuh an chàk tih he hmun tlawhtu pakhat chuan a sawi a, zahna lantir nana tlawh an nih thu min hrilh nghe nghe.

Haw hma ni, February 20, 2026 khan Kashmir-a hmun hmingthang, khualzinte tlawh nasat em em Gulmarg chu kan tlawh bawk a, Gulmarg pawh hi rawlrala che thin (terrorist) ten chet an lo lak tawhna niin October 24, 2024 khan mi sipai pahnih tiamin mi pali in nunna an chan. He hmun hi tlang sang tak, Sea level atanga meters 2,650 atanga 2,730 (8,690 to 8,950 feet) a sanga awm a ni a, Tlangsang tak chungah, zawl zau tak chhawng hnih awmin thlasik lai chuan vur-in a khuh hneh thin hle. Tourist an tam thin tih a hriatna chu Gumboot leh Jacket lum hawhna tur dawr ringawt pawh a tam hle. Gulmarg tlang chhawng chung zawk hi cable car a kal ngai a ni. Sakawr, Mountain bike leh Sledge te hawh tur a awm a, a duh tan Skiing te a tih theih a, helicopter thlenga chuan tur a awm a, a hmunah hian Hotel changkang tak tak pawh a awm bawk.

Srinagar khawchhung bakah hmun hla tak tak tlawh-a kal kan ni a, an kawng te a tha viau a, chutihrual chuan hmun tin maia sipai duty hmuh tur an awm piah lamah Sipai hmun a tam em em a, sipai motor inzui duah duah hi kalna lam apiangah tawh tur leh hmuh tur an awm deuh reng a, hei hian an ram hi a ralmuang lo tih a tichiang a, sipai duty te hi a ralmuanna chhan chu a ni ve tho bawk. Vairama kal a, ka rilru-a awm thin pakhat chu Traffic system hi a ni a, vai ho chuhhelh lutuk thin hi ka lo ngei ve ringawt thin a, mahse, an kawngpui peng­thuam tam lutuk leh an kawng zauh ngaihtuah hi chuan awm hi tihpui chang ka nei. Keini khawpui, loh theih loh vanga Traffic zawm tha lo thei lova awm, kan hmingthatpui viau erawh hi chu a lawmawm tho mai.

Kashmir ho hi vai kan tih ho lakah hi chuan an lo danglam hle a, anni hi chu nghet taka khawthlang ram te nen inkungkaihna tha tak nei an nih vang pawh a ni maithei. Incheina leh khawsak phungah pawh an danglam a, an In sak dan kalphung pawh India ram state dang te nen chuan hran hlak a ni a, an thingtlang khua te pawh Europe thingtlang khua te hi a ang ka ti a, Kashmiri ho hi serial leh film kan en hnem tak Turkish ho ka tehkhin ber. Chuan Kashmir hi India ram Apple 90+% thartu an ni a, Khawkherh (Walnut) hi 70+% thartu an lo ni leh zel... Apple leh Walnut te hi chu sawrkar-i a hralhna a buipui sak lo a, a neitute kuta awm a ni...