ZALEN May 4, 2025 : Irrigation & Water Resources Department (IWRD) huan tui lian lo thleng thei laka mipuite inralrinna tur lo hrilhtu, ‘flood warning system’ chu Tlawngah an bun fel tawh a. Tui lian a lo thlen dawn pawhin a hmain mipuite hnenah inralrinna tur tichhuak turin an inpeih tawh.

ZALEN-in IWRD thawktute hnen atanga thu a dawn danin flood warning system hi hmun riatah bun niin hengte hi a ri leh hmuh theih chi (audio-visual) pali leh a ri chauh tichhuak thei (audio) hmun li-ah te a ni.

Audio-visual hi Sairang, Sairang Dinthar, Bairabi Hmar veng leh Chhim vengah te bun a ni a. A ri chauh tichhuak chi (audio) hi Hortoki-a hmun hnih, Sihhmui leh Sairang-Lengpui inkarahte bun a ni.

Flood warning system an bunna hmunte hi mipuiten Tlawng an tlawhpawh zualna hmunahte a ni a, tui lian lo thleng pawh nise he khawl hmang hian mipuite an lo inralring hman dawn niin an sawi.

IWRD thawktute chuan Tlawngah hian tui chim chin san zawng hriat theihna hmun rukah an dah tih sawiin hengte hi Pukpui leh Mausen inkar, Thenzawl leh Buarpui inkar, Darlung kai, Sihhmui, Buichali leh Bairabi-ah te nia sawiin heng hmuna censor an dahte hian ruahtui tla zat, tui awm dan leh a chim chin san zawng an lo chhinchhiah ang a, chu chuan hlauhawm lo thleng tur chu lo hmuin tui lian hlauhawm a thlen dawn chuan warning a tichhuak thin dawn niin an sawi a. Tuna khawl an dah chu a tangkai hle dawn nia sawiin Tlawng hnarah ruah sur nasa vanga tui lian a awm dawn chuan lui mawng lam, Sairang leh Bairabi te chu an lo inring vek hman dawn niin an sawi bawk.

Tlawnga flood warning system bun hi National Hydrology Project 2016 hnuaia din a ni a, kum 2019 atang khan hmalak chhoh tan a niin Covid-19-in a tihbuai vangin a hun taka thawh zawh hman a ni lo.