ZALEN June 3, 2025; Khaw chin leh tui dinhmun hrang hrangte thlirin pangngai taka tui sem leh theih hun tur chiang taka sawi theih a ni lo.

PHE department tarlan danin, tun hnai ruahsur nasa avanga tuilian leh tui nu nasa lutuk avangin Aizawl khawpui chawmtu Greater Aizawl Water Supply Scheme (GAWSS) Phase - I & II te chu 30th May 2025 (Friday) ațanga vawiin 3rd June 2025 thlengin Tui pump theih a ni lo a. Power Transformer lam țhat loh avangin GAWSS - III @Setlak hi 26th May 2025(Monday) ațangin Tui pump theih a ni lo bawk. 

Chutih laiin Vaivakawn – Zohnuai lei tlakhniamna hmunah GAWSS – III tui pump-na Pipe atangin 2nd June 2025 (Monday) khan nasa takin tui a lo chhuak a. Tui pump loh lai a nih avangin hetianga tui lo chhuak vak mai hi a chhan hriatthiam a har in helaia cheng mipui te an ralkhel hle tih hriat a ni a, pawi kan ti hle a ni.             Tin, 30th May 2025(Friday) khan Zemabawk South (NH 54) kawngchhak lam inhmun laihna hmunah nasa takin lei a min a, he leimin hian a chhak tlang, Beraw Tlang panna kawng (Kacha Road) hrula kal Assam Rifles leh Lungbial mipui te tui pekna Pipe line a hnawl chhia a. Hemi a nih vangin tun thlengin tui supply theih ala ni lo a, Pipe line siamțhat hna ngawrh taka thawh mek a ni bawk.

Heng bakah hian, khuarel chhiatna hmun hrang hrangah thlengin hengte avang hian khawpui chhung tui semna (Distribution Line) lamah chhiatna nasa tak an tawk mek bawk a ni. Heng chhan hrang hrang avang hian khawpui chhungah tuisem mumal theih a ni lova. Khaw chin leh tui dinhmun hrang hrangte thlirin pangngai taka tui sem leh theih hun tur hi chiang taka sawi theih a ni lo. 

Mipui te hriatthiamna an dil a, ruahtui dahkhawl lamah tan lo la zel a PHE department te țawiawm turin an ngen.

#ZalenNews