ZALEN May 4, 2025 : Kumin chhungin Mizoramah ui a seh nia rin vanga boral mi pakhat an awm tawh a. Thenawm, Manipur-a ui a hri a len avangin tun hnaia ui a hri laka invenna vaccine la an thahnem hle.

ZALEN-in AH&Vety department thawktute hnen atanga thu a dawn danin April 4, 2025 khan ui a seh vanga boral nia rin mi pakhat chu Durtlang damdawi inah a thi a. Vanduaina tawk hi hnam dang (Som Lal Hemron?) niin Aizawl atanga hla vak lo khaw pakhata mi a ni a. Amah hi Assam a zinnaah uiin a seh a, Durtlang damdawi inah hian enkawlin a thih phah a. Hemi bak hi chu department-in ui a seh report an la dawng lo.

Hetih lai hian thenawm, Manipur-a Churachandpur district-ah ui a hri a len avang leh mi thenkhatten an thihpui avangin tun hnaiah hri laka invenna vaccine la an tam hle a. April, 2025 chhung ringawt pawh khan vaccine la hi 10,634 an awm a ni.

AH&Vety department thawktute chuan, “Ni dangah chuan vaccine la hi thla khatah 2,000 vel chauhte an ni a; mahse, thenawm state-a ui a hri a len vang hian April thla kha chuan vaccine la hi an tam hle a. Tuna kan chhinchhiah bak pawh hi hmun kilkhawr deuha pek; mahse, chhinchhiah loh eng emaw zat a awmin kan ring a ni,” an ti.

Vaccine chu Vety doctor awmna dispensary-ah a mamawh tan a lak theih nia sawiin vaccine lak man hi Rs. 100 atanga Rs. 150 inkar vel niin an sawi bawk.