Aizawl: Animal Husbandry & Veterinary department (AH&Vety)-in vawk pul hri, African Swine Fever (ASF) vanga kum 2021 chhunga vawk suat neitute hnena zangnadawmna pek tur bank-ah a thawn hnuin bank-in zangnadawmna dawngtu turte account-ah an thun fel thawkhat tawh. Hetihlai hian kumin (October ni 13 thleng)-a ASF vanga vawk thi chhinchhiah chu 11,000 (vawk suat zat 10,105) a tling leh tawh.

AH&Vety Director Dr. Lalrinpuii Sailo hnen atanga ZALEN thudawn danin, kum 2021 chhunga vawk suat zangnadawmna chu a dawngtu turte hnenah pek fel thawkhat tawh a nih laiin, document (bank account) fel tawk lo thenkhat, pawisa la luh lohna a la awm a, chungte chu buaipui chhunzawm zel a ni.

Vety director sawi danin ASF vanga vawk thi neituten zangnadawmna an dawn zel theihna turin sawrkar laipuiah hma an la leh mek a, chungah chuan zangnadawmna dawng awm ngawih ngawih, la dawng lote pawh telh an ni dawn a. State hrang hrang zingah ASF vanga vawk suat zangnadawmna pek awmchhun chu Mizoram niin, ASF chungchang a report pe tha ber pawh a ni.

Mizoram sawrkar chuan kum 2021 chhunga vawk suat neitute zangnadawmna pek tur sorkar laipuiah a dil a, vawk 10,910 atan Rs 11,69,94,414 dilin, first instalment Rs 5,84,97,000 chu March 22, 2022 khan sorkar laipuiin Mizoram sorkar a rawn pe a. Sawrkar laipuiin a pek zat chiah Mizoram sorkarin a pek ve a ngai a, a vaiin Rs 11,69,94,000 a tling.

Mizoram sorkara Finance department chuan sorkar laipuiin a rawn pek leh Mizoram sorkarin a pek ASF zangnadawmna sum, chhungkaw 2,488 hnena pek tur Rs 10,48,42,200 chu July 1, 2022 khan AH&Vety department hnenah a pe a ni.