ZALEN February 5, 2025 : Mizo National Front chuan Zirlai exam lai leh inthlan buai laia e-KYC tih a ngai tih Food Civil Supplies & Consumer Affairs Department in thuchhuah an siam chu an hriatthiam loh thu an sawi a, zirlai nei chhungkua leh inthlan buaipuitute tan phurrit nasa tak an siam, tiin invauna order ni hial an hriat thu an sawi.

Vawiin khan MNF Legal Board Secretary David R. Lalsawmtluanga chuan, "February 4, 2025 khan FCS&CA Dept lamin chhungtin phek buai ngai ration Card-ah e-KYC ti vek tur leh ni 28.02.2025 ral hma ngei ngeia ti hman lote chu ration card atanga paih vek tura Mizo mipuite min vau zuite hi pawi kan ti em em bawk a, ration card-a awm tur chhungkaw member zawng zawng, mahni ngei kala Aadhaar No chhut luh bakah finger print hmeh vek tur a ni a, VC leh LC inthlan buai nen, kum tawp Exam lai lo ni bawk nen, zirlai nei chhungkua zawng zawng leh inthlanna buaipuitute tan phurrit nasa tak leh in vauna order an siam hi vanduai thlak kan ti tak zet a, a tlem thei ang berin Vote thlak se tih duhna a ni em aw? kan ti hial a ni," a ti.

MNF Legal Board Secretary chuan, "Tun hnu-ah chuan hetianga zirna tibuai zawng leh chhungkua zawng zawng manganna tur lam thutlukna siam tawh lo turin sawrkar kan ngen nghal a ni. ZPM sawrkarin mipui rorelna bulthut zahlo taka pawngsual a, mipui rorelna langsar taka a beih chhunzawm tak zel avang hian kan hma lawka VC leh LC inthlanpui neih turah hian, mipui rorelna venghim tur leh ram danpuiin mipui thuneihna min pek democracy ngulpui tungding tur te leh sum leh thuneihna ringawt atchilhna do a, Mizoram leh a chhunga mipui chengte dikna leh duhthlanna tung ding zel tura penchhuak MNF Candidate te thlang theuh turin Mizoram mipui zawng zawng khawngaihna kan dil a ni," a ti bawk.