ZALEN May 14, 2025; Zirtirtu hlun, zirtirtu tha chawimawina India President kut atanga lo dawng tawh, kum 100 mi Arsiliana, Durtlang chu nimin tlai khan a boral a, vawiin chhun dar 12 khan vui a ni.

Arsiliana hi kum 1926, October ni 15 ah unau 9 zinga 7-na niin Rochhunga Rokhum (L) leh Leipuii (L) te karah a lo piang a. Amah hi zirtirtu hlun niin, kum 1990 a a pension thlengin Durtlang Primary School III-ah a thawk.

Zirtirtu hna kum 42 thawka sawrkar ațanga a pension hnu kum 1990 khan Education Department hnuaia SCERT Staff thenkhat leh a thian thenkhatte nen mitdelte puala hamthatna kawng zawnsak dan an ngaihtuah a. Pawl siam a, pawl kalhmang tur leh mitdelte enkawl dante chu central sawrkar leh hetiang lama hmala tawhte atangin an zir chian hnuah Samaritan Association for the Blind chu kum 1990-ah an din.

Kum 1990 khan The National Foundation for Teachers Welfare (NFTW) chuan India ram pumpuia zirtirtu tha Pathum (3) a thlan chhuah zinga telin Prof. D.C. Sharma Memorial Award chu India President hnen atangin a dawng hial a ni.

Kum 75-mi a nih hnuah All India Radio-ah B-Grade Artist a ni a, Pipu zai hrang hrangte nen hla eng emaw zat a record a, a thianpa Pu R. Thanga nen hlate phuahin hla bu bakah audio cassette pawh an siam a ni.